Ўзбекистон ҳукумати ўқув дастурлари ва дарсликларни янгилашни режалаштирмоқда. Бу ҳақда Янги Ўзбекистоннинг 2022/2026 йилларга мўлжалланган Тараққиёт стратегияси ва уни 2022 йилда амалга ошириш бўйича «йўл харитаси» лойиҳасида сўз боради.
Олий Мажлис Қонунчилик палатасининг маълум қилишича, 2026 йилга қадар ўқув дастурлари ва дарсликларни илғор хорижий тажриба асосида тўла қайта кўриб чиқилади. Миллий ўқув дастурига асосан 2026 йилга қадар 699 номдаги, шу жумладан, 2022 йилда 296 номдаги янги дарсликлар, машқ дафтарлари, ўқитувчи методика китоблари ҳамда мобил иловаларни яратилади.
Ҳужжат лойиҳасида Миллий ўқув дастури бўйича янги методикаларга ўқитувчиларни ўқитиш мақсадида Электрон малака ошириш платформаси учун 2026 йилга қадар жами 769 та видеодарс яратилиши, айниқса, дарслик ва ўқув-методик мажмуаларни тажриба-синовдан ҳамда чет эллик мутахассислар иштирокида экспертизадан ўтказиш тизимини жорий этиш чора-тадбирлари белгиланган.
Шунингдек, ўрта таълим тизимини замон талабларига мослаштириш мақсадида:
- умумий ўрта таълим муассасаларида дарсликларни янгилаш дастурини амалга ошириш учун давлат бюджетидан 605 миллиард сўм ажратилади;
- 141 мингта янги ўқув ўринлари яратилиб, уларнинг сони 2026 йил якунига қадар 1,2 миллионгача етказилади;
- мактаб ўқувчиларини касб-ҳунарга ўқитиш бўйича давлат буюртмаси асосида умумтаълим мактаблари касб ўрганиш истагидаги битирувчиларини давлат томонидан камида бир касбни эгаллашига кўмаклашувчи тизим жорий этилади.
Изоҳ (0)