Ўзбекистонда «омикрон» аниқлангани йўқ, бироқ хотиржамликка берилиш ҳам ярамайди — Нурмат Отабеков

Санитария-эпидемиологик осойишталик ва жамоат саломатлиги хизмати бошлиғи ўринбосари, тиббиёт фанлари доктори, профессор Нурмат Отабеков Ўзбекистонда «омикрон» аниқлангани йўқлигини маълум қилди, деб хабар беради ССВ матбуот хизмати.

Унинг сўзларига кўра, сўнгги кунларда дунё бўйлаб ушбу мутациянинг тарқалиш географияси шиддат билан кенгайиб бораётгани сабаб янги штаммнинг Ўзбекистонга кириб келиш эҳтимоли йўқ эмас.

«Бироқ бу ҳолатдан фойдаланиб, ижтимоий тармоқлар орқали турли ёлғон ва асоссиз ахборот тарқатиш, аҳоли орасида ортиқча ваҳима кўтариш, ўйлайманки, ҳеч бир мезонга тўғри келмайди», — дейди Отабеков.

Унинг фикрича, «омикрон»дан соғайиш муддати қисқа ва касалланганларда шифохоналарга ётиш эҳтимоли пастлиги инобатга олинса, Ўзбекистон вируснинг кўтарилиш хавфига тайёр.

«Бироқ ортиқча хотиржамликка берилиш ҳам ярамайди. Сабаби ‘омикрон’ бошқа штаммларга қараганда анчагина юқумли ва қисқа муддатда аҳолининг катта қисмини зарарлаши мумкин. Шу боис айни пайтда карантин қоидаларига қатъий риоя қилиш, эмлаш тадбирларида фаол иштирок этиш ҳар қачонгидан-да муҳим.

Қолаверса, мамлакатимизда COVID-19 билан касалланиш ҳолатлари кўтарилган аввалги пайтларда яхши самара берган амалиётни давом эттириш, яъни оилавий шифокор пункти ва поликлиникалар орқали COVID-бох (аптечка) тарқатиш, хасталик енгил кечаётган беморларни амбулатор шароитда даволаш мақсадга мувофиқ. Бу, ўз навбатида, ихтисослашган тиббиёт муассасаларига ортиқча юкламалар тушишининг ҳам олдини олади, — дейди у.

Эслатиб ўтамиз, декабрь бошларида Жанубий Кореяда Ўзбекистон фуқароси «омикрон» вирусини юқтириб олгани тўғрисида хабар берилганди.