Шахмат бўйича жаҳон чемпиони Нодирбек Абдусатторовга совға қилинган уй қайтариб олингани рад этилди

Туризм ва спорт вазирлиги ижтимоий тармоқларда шахмат бўйича жаҳон чемпиони Нодирбек Абдусатторовга берилган уй калити қайтариб олинган тўғрисида тарқалган хабарларга муносабат билдирди.

29 декабрь куни Польша пойтахти Варшавада шахматнинг рапид ва блитс йўналиши бўйича Жаҳон чемпионатида ўзбекистонлик Нодирбек Абдусатторов шахмат бўйича жаҳон чемпионига айлангани тўғрисида хабар берилганди. У Ўзбекистон президентининг фармонига асосан «Мард ўғлон» давлат мукофоти билан тақдирланган ва унга президент совғаси сифатида Тошкент шаҳар Махтумқули кўчаси 91/1 уй манзилидан икки хонали квартиранинг калитлари топширилган.

«Бироқ турли ёлғон ва бўҳтон хабарлар тарқатиш орқали ўз обуначиларини кўпайтиришга одатланган блогерлар яна ҳунарларини кўрсатишмоқда. Жумладан, улар уялмасдан Нодирбек Абдусатторовга совға қилинган уй калитлари қайтариб олинди, деган мазмундаги хабарларни ижтимоий тармоқлар орқали тарқатишмоқда. Энг ёмони, халқимиз ҳам шу ёлғон хабарларга ишониб қолишаётганида», — дейилади муносабатда.

7 январь куни Тошкент шаҳар ҳокими ўринбосари – Туризм ва спорт бош бошқармаси бошлиғи Фахриддин Давруков Нодирбек Абдусатторов ва унинг ота-онаси президент совғаси бўлган 2 хонали квартира билан таништирган.

Таъкидланишича, тез кунларда қонунчиликда белгиланган расмиятчилик ишлари якунланиб, ушбу хонадон Нодирбек Абдусатторовга топширилади.

Вазирлик матбуот хизмати блогерларни Ўзбекистон қонунчилигига кўра, ёлғон ва бўҳтон хабар тарқатганлик учун ҳам ўрнатилган тартибда жазо чоралари қўлланилиши ҳақида огоҳлантирган.

Маълумот учун, Нодирбек Абдусатторов 2017 йилда, 13 ёшида гроссмейстерлик унвонини олган. 2021 йил январь ҳолатига кўра, Абдусатторов шахмат тарихидаги энг ёш бешинчи гроссмейстер бўлиб турибди. У 2018 йилда Ўзбекистон терма жамоаси сафида Бутунжаҳон шахмат Олимпиадасида биринчи ўринни қўлга киритганди ва президент совғаси — Spark автомобилини қабул қилиб олганди.