Деновдаги портлаш оқибатида етган зарар миқдори ва талафотлар ҳақида маълумот берилди

АОКАда 8 январь куни бўлиб ўтган брифингда ФВВ Давлат ёнғин назоратини ташкил этиш бош бошқармаси бошлиғи, полковник Ўлмас Музаффаров Денов шаҳрида жойлашган Indenim савдо мажмуаси биносидаги портлаш оқибатида қанча зарар етгани маълум қилди.

Музаффаровнинг қайд этишича, ҳодиса оқибатида 2 киши вафот этган, 9 нафари турли даражадаги тан жароҳати олган.

«140 та турар жойга, яъни 76 та ҳовли-уй, 5 та кўп қаватли уйнинг 64 та хонадони, 86 та нотурар жой, умумий ҳисобда 226 та иморатга зиён етган. Талафот кўрган 25 та бино, жумладан, 13 та турар ва 12 та нотурар жой яроқсиз ҳолга келган», — деди у.

Бошқарма бошлиғининг сўзларига кўра, ҳукумат комиссияси томонидан яроқсиз деб топилган 13 та хонадон эгалари бошқа жойга кўчирилиб, жойидан янгидан уй-жой қуриш бўйича пудратчилар бириктирилган ва қурилиш-монтаж ишлари олиб борилмоқда.

Таъмирталаб 69 та турар жой биноларига, жумладан, 64 та ҳовли-уй ва 5 та кўп қаватли уйнинг 64 та хонадони тартибга келтириш мақсадида пудратчилар жалб қилиниб, таъмирлаш-тиклаш ишлари бажарилмоқда. Таъмирталаб 60 та нотурар жой биноларида тадбиркорлар томонидан таъмирлаш ва қурилиш ишлари амалга оширилмоқда.

Мустақил баҳоловчи ташкилотлар томонидан ҳодиса оқибатида етказилган зарар миқдори ҳисоблаб чиқилган.

«226 та кўчмас мулк объектига етказилган зарар миқдори 22,6 миллиард сўмга баҳоланган. Шундан мажмуага етказилган зарар миқдори 14,4 миллиард сўмни ташкил этади», — деди у.

Етказилган зарарни қоплаш ишлари Сурхондарё вилояти ҳокимлиги томонидан ташкил этилаётгани айтиб ўтилди.

Эслатиб ўтамиз, Сурхондарёнинг Денов шаҳри марказидаги Indenim савдо мажмуасида кучли портлаш 7 декабрь тонгида юз берган. Расмий маълумотларга кўра, портлаш оқибатида икки киши ҳалок бўлган, 11 киши турли тан жароҳатлари билан шифохонага ётқизилган. Кейинчалик Деновдаги портлашда 65 та уй зарар кўргани, 6 та хонадон деворлари эса ёрилиб, яшаш учун хавфли ҳолатга келиб қолгани маълум бўлди.

Сурхондарё вилояти ҳокими Тўра Боболов икки нафар марҳумнинг яқинларига моддий ёрдам пули тўлаб берилаётганини маълум қилди. У, шунингдек, тадбиркорларга етказилган зарар, 65 та хонадон таъмири ва ижтимоий соҳа объектларининг зарарланиши оқибатида келиб чиққан чиқимлар ҳам суд қарорига кўра икки хил усулда қопланишини билдирган.

Ҳолат юзасидан Жиноят кодексининг 257-модда (меҳнатни муҳофаза қилиш қоидаларини бузиш) ва 259-моддалари (ёнғин хавфсизлиги қоидаларини бузиш) билан жиноят иши қўзғатилган. Портлаш юзасидан 3 киши қамоққа олинган.

Шавкат Мирзиёев бошчилигида ўтказилган видеоселектор йиғилишида давлат раҳбари Деновда газ қувури портлаши натижасида содир бўлган ҳодисага тўхталиб, ушбу нохуш воқеа ҳамманинг кўзини очиши кераклигини айтди.