AOKAda 8-yanvar kuni bo‘lib o‘tgan brifingda FVV Davlat yong‘in nazoratini tashkil etish bosh boshqarmasi boshlig‘i, polkovnik O‘lmas Muzaffarov Denov shahrida joylashgan Indenim savdo majmuasi binosidagi portlash oqibatida qancha zarar yetgani ma’lum qildi.
Muzaffarovning qayd etishicha, hodisa oqibatida 2 kishi vafot etgan, 9 nafari turli darajadagi tan jarohati olgan.
“140 ta turar joyga, ya’ni 76 ta hovli-uy, 5 ta ko‘p qavatli uyning 64 ta xonadoni, 86 ta noturar joy, umumiy hisobda 226 ta imoratga ziyon yetgan. Talafot ko‘rgan 25 ta bino, jumladan, 13 ta turar va 12 ta noturar joy yaroqsiz holga kelgan”, — dedi u.
Boshqarma boshlig‘ining so‘zlariga ko‘ra, hukumat komissiyasi tomonidan yaroqsiz deb topilgan 13 ta xonadon egalari boshqa joyga ko‘chirilib, joyidan yangidan uy-joy qurish bo‘yicha pudratchilar biriktirilgan va qurilish-montaj ishlari olib borilmoqda.
Ta’mirtalab 69 ta turar joy binolariga, jumladan, 64 ta hovli-uy va 5 ta ko‘p qavatli uyning 64 ta xonadoni tartibga keltirish maqsadida pudratchilar jalb qilinib, ta’mirlash-tiklash ishlari bajarilmoqda. Ta’mirtalab 60 ta noturar joy binolarida tadbirkorlar tomonidan ta’mirlash va qurilish ishlari amalga oshirilmoqda.
Mustaqil baholovchi tashkilotlar tomonidan hodisa oqibatida yetkazilgan zarar miqdori hisoblab chiqilgan.
“226 ta ko‘chmas mulk obyektiga yetkazilgan zarar miqdori 22,6 milliard so‘mga baholangan. Shundan majmuaga yetkazilgan zarar miqdori 14,4 milliard so‘mni tashkil etadi”, — dedi u.
Yetkazilgan zararni qoplash ishlari Surxondaryo viloyati hokimligi tomonidan tashkil etilayotgani aytib o‘tildi.
Eslatib o‘tamiz, Surxondaryoning Denov shahri markazidagi Indenim savdo majmuasida kuchli portlash 7-dekabr tongida yuz bergan. Rasmiy ma’lumotlarga ko‘ra, portlash oqibatida ikki kishi halok bo‘lgan, 11 kishi turli tan jarohatlari bilan shifoxonaga yotqizilgan. Keyinchalik Denovdagi portlashda 65 ta uy zarar ko‘rgani, 6 ta xonadon devorlari esa yorilib, yashash uchun xavfli holatga kelib qolgani ma’lum bo‘ldi.
Surxondaryo viloyati hokimi To‘ra Bobolov ikki nafar marhumning yaqinlariga moddiy yordam puli to‘lab berilayotganini ma’lum qildi. U, shuningdek, tadbirkorlarga yetkazilgan zarar, 65 ta xonadon ta’miri va ijtimoiy soha obyektlarining zararlanishi oqibatida kelib chiqqan chiqimlar ham sud qaroriga ko‘ra ikki xil usulda qoplanishini bildirgan.
Holat yuzasidan Jinoyat kodeksining 257-modda (mehnatni muhofaza qilish qoidalarini buzish) va 259-moddalari (yong‘in xavfsizligi qoidalarini buzish) bilan jinoyat ishi qo‘zg‘atilgan. Portlash yuzasidan 3 kishi qamoqqa olingan.
Shavkat Mirziyoyev boshchiligida o‘tkazilgan videoselektor yig‘ilishida davlat rahbari Denovda gaz quvuri portlashi natijasida sodir bo‘lgan hodisaga to‘xtalib, ushbu noxush voqea hammaning ko‘zini ochishi kerakligini aytdi.
Izoh (0)