Тошкент тумани «Чувалачи» маҳалласи Гуляшнар кўчасида 2021 йилнинг 6 май куни 19 ёшли йигит трансформатор токи уриши оқибатида вафот этгани хабар қилинганди. Бош прокуратуранинг «Дарё»га маълум қилишича, ҳолат юзасидан очиқ суд мажлиси бўлиб ўтган.
Қайд этилишича, С.С. (1984 йилда туғилган) Тошкент тумани «Электр таъминоти» корхонаси «Келес» устачилик бўлими катта устаси лавозимида ишлаб келган. У эгаллаб турган лавозимига кўра мансабдор шахс ҳисобланиб, «Чувалачи» маҳалла раиси ва фуқаролари томонидан Тошкент тумани Чувалачи ҳудуди Гуляшнар кўчасида жойлашган трансформаторга темир панжара улангани ва ундан ток чиқаётгани тўғрисида бир неча маротаба оғзаки огоҳлантирилган. Аммо мансабдор шахс оғзаки хабарларни текширмасдан, назоратсиз қолдирган.
Ўзига юклатилган вазифаларга лоқайдлик билан қарагани учун С.С.га Жиноят кодексининг 207-моддаси (мансабга совуққонлик билан қараш) билан жиноят иши қўзғатилган.
Очиқ судда у Жиноят кодексининг 257-моддаси 2-қисми «а» банди (одам ўлимига сабаб бўлган меҳнатни муҳофаза қилиш қоидаларини бузиш) билан айбли деб топилган. Унга нисбатан икки йил муддатга меҳнатни муҳофаза қилиш фаолияти билан боғлиқ лавозимларда ишлаш ҳуқуқидан маҳрум қилиш, 5 йилга озодликдан чеклаш жазоси тайинланган.
Эслатиб ўтамиз, 19 ёшли Х.Т.нинг ўлимига кўкрак қафаси ўнг ёнбош юзаси, ўнг елка ўрта учлиги соҳаси электротамғалари каби ташқи тан жароҳатлари аниқлангани, унинг ўлимига электрожароҳат, техник электр токининг фибриляцион таъсири юзасидан келиб чиққан юрак фаолиятининг ўткир етишмовчилиги, ўнг ўпка плеврити сабаб бўлган.
Кейинроқ «Ҳудудий электр тармоқлари» ҳолат тегишли мутасаддилар томонидан назоратга олинганини маълум қилиб, жамоатчиликни воқеаси бўйича якуний хулоса чиқармасликка чақирганди.
Изоҳ (0)