Toshkent tumani “Chuvalachi” mahallasi Gulyashnar ko‘chasida 2021-yilning 6-may kuni 19 yoshli yigit transformator toki urishi oqibatida vafot etgani xabar qilingandi. Bosh prokuraturaning “Daryo”ga ma’lum qilishicha, holat yuzasidan ochiq sud majlisi bo‘lib o‘tgan.
Qayd etilishicha, S.S. (1984-yilda tug‘ilgan) Toshkent tumani “Elektr ta’minoti” korxonasi “Keles” ustachilik bo‘limi katta ustasi lavozimida ishlab kelgan. U egallab turgan lavozimiga ko‘ra mansabdor shaxs hisoblanib, “Chuvalachi” mahalla raisi va fuqarolari tomonidan Toshkent tumani Chuvalachi hududi Gulyashnar ko‘chasida joylashgan transformatorga temir panjara ulangani va undan tok chiqayotgani to‘g‘risida bir necha marotaba og‘zaki ogohlantirilgan. Ammo mansabdor shaxs og‘zaki xabarlarni tekshirmasdan, nazoratsiz qoldirgan.
O‘ziga yuklatilgan vazifalarga loqaydlik bilan qaragani uchun S.S.ga Jinoyat kodeksining 207-moddasi (mansabga sovuqqonlik bilan qarash) bilan jinoyat ishi qo‘zg‘atilgan.
Ochiq sudda u Jinoyat kodeksining 257-moddasi 2-qismi “a” bandi (odam o‘limiga sabab bo‘lgan mehnatni muhofaza qilish qoidalarini buzish) bilan aybli deb topilgan. Unga nisbatan ikki yil muddatga mehnatni muhofaza qilish faoliyati bilan bog‘liq lavozimlarda ishlash huquqidan mahrum qilish, 5 yilga ozodlikdan cheklash jazosi tayinlangan.
Eslatib o‘tamiz, 19 yoshli X.T.ning o‘limiga ko‘krak qafasi o‘ng yonbosh yuzasi, o‘ng yelka o‘rta uchligi sohasi elektrotamg‘alari kabi tashqi tan jarohatlari aniqlangani, uning o‘limiga elektrojarohat, texnik elektr tokining fibrilyatsion ta’siri yuzasidan kelib chiqqan yurak faoliyatining o‘tkir yetishmovchiligi, o‘ng o‘pka plevriti sabab bo‘lgan.
Keyinroq “Hududiy elektr tarmoqlari” holat tegishli mutasaddilar tomonidan nazoratga olinganini ma’lum qilib, jamoatchilikni voqeasi bo‘yicha yakuniy xulosa chiqarmaslikka chaqirgandi.
Izoh (0)