Қашқадарё вилояти Қарши шаҳрида 2021 йил 17 август куни ушу-санда бўйича жаҳон чемпиони, MMA жангчиси Элбек Раҳимов ўлдириб кетилганди. Суд ахборот хизмати раҳбари Фарҳод Тиловов «Дарё»га ҳолат юзасидан очиқ суд бошланганини маълум қилди.
Қайд этилишича, 6 январь куни Қашқадарё вилоят судида судланувчи Т.А. ва бошқалар (жами 26 шахс) га нисбатан жиноят ишини кўриб чиқиш бўйича очиқ суд бошланган. Жиноят иши Қашқадарё вилоят суди судьяси Ф.Юсупов раислигида кўрилмоқда.
Судланувчилар Жиноят кодексининг 97 (қасддан одам ўлдириш), 28,104 (қасддан баданга оғир шикаст етказиш), 104, 105 (қасддан баданга ўртача оғир шикаст етказиш), 109 (қасддан баданга енгил шикаст етказиш), 127 (вояга етмаган шахсни ғайриижтимоий хатти-ҳаракатларга жалб қилиш), 28,137 (одам ўғирлаш), 137, 169 (ўғрилик), 210 (пора олиш), 28,211 (пора бериш), 230 (айбсиз кишини жавобгарликка тортиш), 238 (ёлғон гувоҳлик бериш), 241-1 (жиноят ҳақида хабар бермаслик ёки уни яшириш), 28,277 (безорилик) моддаларида назарда тутилган жиноятларни содир этганликда айбланмоқда.
Суд 2022 йилнинг 13 январь кунига қадар танаффус эълон қилган.
Эслатиб ўтамиз, спорт устаси Элбек Раҳимов 17 август куни соат 09:45 да кўп қаватли уйдаги хонадони олдида бир гуруҳ шахслар томонидан ўлдириб кетилган. «Йигитни аввалига роса дўппослашган. Сўнгра пичоқлаб, яримжон ҳолатда машинага тиқиб олиб кетишган. Марҳумнинг жасади Чироқчи туманининг Еттитом қишлоғидан топилган», — деган «Дарё» мухбири билан суҳбатлашган манба.
Содир бўлган мудҳиш қотиллик ҳақида гапирган воқеа гувоҳлари 102 қисқа рақамларига хабар берилганидан сўнг, ИИБ ходимлари воқеа жойига 40-45 дақиқада етиб келганини, шу боис қотилликнинг олди олинмаганини айтган. «102 га шахсан ўзим уч марта қўнғироқ қилдим. Хўп, ариза қабул қилинди, ёзиб олдик, дея менга қўполлик қилишди. Улар келишганда эса, безори болалар йигитни яримжон ҳолатда машинага тиқиб олиб кетишганди», — деган гувоҳлардан бири.
Изоҳ (0)