Самарқанд вилояти Йўл ҳаракати хавфсизлиги бошқармаси тизимида мобил радарлар ўрнатилган автомашиналар хизмат қилмоқда, деб хабар беради вилоят Ички ишлар бошқармаси.
Маълум қилинишича, Самарқанд вилояти ИИБ ЙҲХБга хизматда фойдаланиш учун Atlas International HK дан беш дона мобил радар ўрнатилиб, махсус жиҳозланган Cobalt автомашиналари ажратилган.
Мобил радар машиналарини бошқариш учун «Йўл ҳаракати хавфсизлиги бошқармаси Йўл-патруль хизмати отряди мобил қурилмалардан фойдаланиш гуруҳи ҳайдовчи-оператор» лавозимига 15 нафар номзод танлаб олинган.
Мобил радарлар ЙҲХБ раҳбарияти томонидан тасдиқланган «Йўл патруль хизмати нарядларини жойлаштириш қайдномаси»га асосан белгиланган йўл ҳудудларида хизмат олиб боради. ЙҲХБ раҳбарияти томонидан берилган қўшимча кўрсатмаларга асосан вақти-вақти билан йўл ҳудудларида мобил радар ўрнатилган автомашиналарни жойлашувини ўзгартириб фаолият кўрсатади.
Радарлар, асосан, вилоятнинг энг кўп йўл-транспорт ҳодисалари содир бўладиган ҳудудлари — «авария ўчоқлари»да ҳайдовчиларни тезлик меъёрларига риоя қилишларини назорат қилади.
Эслатиб ўтамиз, 2021 йил сентябрь бошларида Қашқадарё вилояти ҳудудидан ўтган автомобиль йўлларида мултирадарлар билан жиҳозланган патруль автомобиллари синов тариқасида ҳаракатланишни бошлагани тўғрисида хабар берилганди. Тўлиқ ишчи ҳолатга ўтган мултирадарли автомобиллар икки кунда тезликни ошириш билан боғлиқ 600 дан ортиқ ҳолатни қайд этган.
Изоҳ (0)