Вазирлар Маҳкамасининг 29 декабрь куни қабул қилинган 788-сонли қарорига мувофиқ, аҳолига архив хизматларини кўрсатишда енгиллик ва қулайликлар яратилади. Бу ҳақда «Расмий хабарлар» хабар қилди.
Қарорга кўра, фойдаланувчига давлат архивлари ўқув залларида ишлаш учун рухсатнома бериш муддати уч иш кунидан 1 иш кунига қисқартирилмоқда. Аҳолига қулайлик яратиш мақсадида архив ҳужжатлари, китоблар ва қўлёзмаларни рақамлаштириш (электрон нусха олиш) учун йиғим миқдори камайтирилмоқда.
Қайд этилишича, қарорнинг қабул қилиниши натижасида архив хизматларини кўрсатишининг муддатлари қисқартирилиши ва йиғим миқдорларининг камайтирилиши орқали жисмоний ва юридик шахсларга енгилик ва қулайликлар яратилади ҳамда коррупциявий хавфлар олди олинади.
Давлат архивлари ўқув залларида архив ҳужжатларидан фойдаланиш бўйича давлат хизмати кўрсатишнинг маъмурий регламентига кўра эндиликда мазкур давлат хизмати давлат хизматлари марказлари ёки Ўзбекистон Республикаси Ягона интерактив давлат хизматлари портали орқали давлат архивлари томонидан кўрсатилади. Давлат хизматидан фойдаланиш учун ариза берувчи Давлат хизматлари марказига ўзи ёки ишончли вакили келиб мурожаат этади ёки давлат хизматларидан электрон шаклда фойдаланиш учун ЯИДХПдан рўйхатдан ўтади.
Ариза берувчи томонидан сўровномани ЭРИ билан тасдиқлаш талаб этилмайди. Фақат ЯИДХП орқали мурожаат этган тақдирда сўровномани ягона идентификация тизими (One ID) орқали тасдиқлаш талаб этилади. Давлат хизмати кўрсатилгани учун йиғим ундирилмайди (архив ҳужжатларидан нусха олиш ва бошқа пуллик архив хизматлари бундан мустасно).
Изоҳ (0)