Қашқадарё вилояти Ғузор туманида қуввати 300 мегаваттгача бўлган қуёш фотоэлектр станциясининг қурилиш лойиҳаси доирасида мустақил электр энергия ишлаб чиқарувчилар учун тендер босқичи бошланди. Бу ҳақда Энергетика вазирлиги хабар қилди.
Маълум қилинишича, лойиҳа Ўзбекистон ҳукумати томонидан Осиё тараққиёт банки кўмагида амалга оширилаётган умумий қуввати 1 гегаватт бўлган ҚФЭСларни қуриш дастури доирасидаги иккинчи лойиҳа ҳисобланади. Дастур Ўзбекистон Энергетика вазирлиги, Молия вазирлиги, Давлат-хусусий шерикликни ривожлантириш агентлиги ҳамда Инвестициялар ва ташқи савдо вазирлиги томонидан амалга оширилмоқда.
Дастур қайта тикланувчи энергия манбаларидан фойдаланишни ривожлантириш ва 2030 йилга қадар мамлакатда электр энергиясига ўсиб бораётган талабни қондириш учун 7 ГВтгача қуёш энергиясини ишлаб чиқариш бўйича стратегиянинг асосий таркибий қисмларидан бири ҳисобланади.
Танлов ғолиби томонидан станцияни лойиҳалаштириш, молиялаштириш, 25 йил давомида фойдаланиш ва техник хизмат кўрсатишни амалга оширилиши кутилмоқда.
Лойиҳа доирасида инвестор лойиҳа ер майдони ёнида жойлашган 500 киловатт кучланишли Ғузор подстанциясигача электр узатиш тармоғини ҳам қуриши керак бўлади.
Лойиҳа ОТБ билан юқорида келтирилган қўшма дастур доирасидаги биринчи лойиҳа — 457 МВт қувватга эга Шеробод ҚФЭСни қуришда қўлланилган халқаро амалиётга мувофиқ амалга оширилади. Станция қурилиши халқаро миқёсда тан олинган моделли давлат-хусусий шериклик тамойиллари асосида, малакали хусусий инвестор — ишлаб чиқувчини жалб этиш ва танлаш мақсадида амалга оширилмоқда.
Аризаларни қабул қилиш муддати 2022 йилнинг 30 март куни соат 18:00 га қадар давом этади.
Эслатиб ўтамиз, қуёш фото электр станцияси 2025 йилда фойдаланишга топширилиши режалаштирилган.
Аввалроқ Ўзбекистонда 3 та қуёш электр станциясини қуриш учун 15 та халқаро компания қизиқиш билдиргани, Хитой компанияси Фарғонада 350 миллион долларга қуёш фотоэлектр станцияси қуришни режалаштираётгани, Қорақалпоғистонда 100 мегаваттли шамол электр станциясини қуриш бўйича битимлар имзолангани хабар қилинганди.
Изоҳ (0)