Samarqand viloyati Yo‘l harakati xavfsizligi boshqarmasi tizimida mobil radarlar o‘rnatilgan avtomashinalar xizmat qilmoqda, deb xabar beradi viloyat Ichki ishlar boshqarmasi.
Ma’lum qilinishicha, Samarqand viloyati IIB YHXBga xizmatda foydalanish uchun Atlas International HKdan besh dona mobil radar o‘rnatilib, maxsus jihozlangan Cobalt avtomashinalari ajratilgan.
Mobil radar mashinalarini boshqarish uchun “Yo‘l harakati xavfsizligi boshqarmasi Yo‘l-patrul xizmati otryadi mobil qurilmalardan foydalanish guruhi haydovchi-operator” lavozimiga 15 nafar nomzod tanlab olingan.
Mobil radarlar YHXB rahbariyati tomonidan tasdiqlangan “Yo‘l patrul xizmati naryadlarini joylashtirish qaydnomasi”ga asosan belgilangan yo‘l hududlarida xizmat olib boradi. YHXB rahbariyati tomonidan berilgan qo‘shimcha ko‘rsatmalarga asosan vaqti-vaqti bilan yo‘l hududlarida mobil radar o‘rnatilgan avtomashinalarni joylashuvini o‘zgartirib faoliyat ko‘rsatadi.
Radarlar, asosan, viloyatning eng ko‘p yo‘l-transport hodisalari sodir bo‘ladigan hududlari — “avariya o‘choqlari”da haydovchilarni tezlik me’yorlariga rioya qilishlarini nazorat qiladi.
Eslatib o‘tamiz, 2021-yil sentabr boshlarida Qashqadaryo viloyati hududidan o‘tgan avtomobil yo‘llarida multiradarlar bilan jihozlangan patrul avtomobillari sinov tariqasida harakatlanishni boshlagani to‘g‘risida xabar berilgandi. To‘liq ishchi holatga o‘tgan multiradarli avtomobillar ikki kunda tezlikni oshirish bilan bog‘liq 600 dan ortiq holatni qayd etgan.
Izoh (0)