Қорақалпоғистонда қўлбола усулда «Қаратау» спиртли ичимлиги ишлаб чиқарадиган яширин корхоналар фаолиятига чек қўйилди

Қорақалпоғистонда қўлбола усулда алкоголь маҳсулотларини ишлаб чиқараётган шахслар аниқланди. Бу ҳақда Иқтисодий жиноятларга қарши курашиш департаменти хабар қилди.

Маълум қилинишича, Бош прокуратура ҳузуридаги департамент, ички ишлар вазирлиги ва Давлат хавфсизлик хизмати ходимлари тезкор тадбир ўтказган. Унда Тўрткўл туманида фуқаро Й.Р. ўз яшаш хонадонида яширин цех ташкил қилиб, қўлбола усулда алкоголь ичимликларни ишлаб чиқараётгани аниқланган. Ундан 2 минг 203 дона «Қаратау» алкоголь маҳсулоти, 15 литр спирт ва бошқа маҳсулотлар ашёвий далил сифатида олинган.

Шунингдек, Чимбой туманида яшовчи фуқаро Г.Т. уйида цех ташкил қилиб, харидор Г.га акциз маркали 120 дона «Қаратау» алкоголь маҳсулотини 4 миллион сўмга сотгани аниқланган. Ундан қалбаки маркали 1 минг 804 дона спиртли ичимлик ашёвий далил сифатида олинган.

Бундан ташқари, департаментнинг Нукус шаҳар бўлими тезкор тадбир ўтказган. Унда фуқаро К.У. Damas машинасида қалбаки акциз маркали жами 530 дона «Қаратау» алкоголь ичимлигини олиб кетаётгани аниқланган. Ундан қўлбола усулда тайёрланган маҳсулотлар ашёвий далил сифатида олинган.

Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.