Польша президенти Анжей Дуданинг COVID-19 га топширган тести мусбат чиқди. Бу ҳақда президент маъмуриятининг раҳбари Павел Шротга таяниб, «Интерфакс» хабар берди.
«Президентнинг аҳволи яхши, у жиддий оғримаган ва шифокорларнинг доимий назоратида», — деб ёзган Шрот Twitter’даги саҳифасида.
Аввалроқ президентнинг атрофидаги бир неча киши коронавирусга чалинган эди.
Associated Press агентлигининг хабар беришича, Болгария Ташқи ишлар вазирлиги раҳбари Теодора Генчовскаяда ҳам коронавирус аниқланган. У шифокорлар назоратида. «Болгария расмийси аввал COVID-19 га қарши вакцинанинг тўлиқ курсини олган», — дейилади АP хабарида.
Декабрь ойининг охирларида Черногория президенти Мило Жукановичда, ундан аввал ЖАР президенти Сирил Рамафосада, БМТ бош котиби Антониу Гутерришда, шунингдек, Оқ уй матбуот котиби Жен Псакида коронавирус аниқлангани тўғрисида хабарлар берилганди.
Изоҳ (0)