Қозоғистон ҳукумати бутун мамлакат бўйлаб фавқулодда ҳолат эълон қилди. 2 январдан бери давом этаётган оммавий норозилик намойишлари туфайли шундай қарорга келинган, деб ёзмоқда «РИА Новости».
Бундан аввал Олмаота шаҳри, Олмаота вилояти, Манғистов вилояти ҳамда Қозоғистон пойтахти Нур-Султон шаҳрида фавқулодда ҳолат жорий этилганди. Фавқулодда ҳолат шароитида мамлакатда 23:00 дан 07:00 гача комендантлик соати амал қилади. Бундан ташқари оммавий йиғилишлар тақиқланган.
NetBlocks сервиси маълумотларига кўра, Қозоғистон бўйлаб интернет узиб қўйилган. Мобил алоқа ҳам деярли ишламаяпти. Шунингдек, бир қанча телеканалларнинг эфири тўхтатилган.
Қозоғистонда норозилик намойишлари суюлтирилган газ нархи икки бараварга (60 тенгедан 120 тенгега) кўтарилганидан сўнг бошланди. 4 январь куни Қозоғистонда полиция ҳамда газ нархининг кескин ошганига қарши чиқаётган намойишчилар ўртасида тўқнашувлар кузатилди.
Кейинчалик газ нархи туширилгани маълум қилинди. Қозоғистон президенти Қосим-Жўмарт Тўқаев намойиш ўтказаётганлардан провокацияга учмасликни сўраган, митинг ўтказишнинг ҳам ўз қонун-қоидалари борлигини, айниқса ҳиссиётга бериладиган ёшлар қалтис ва қонунга зид ҳаракатлар билан ўз келажагига салбий таъсир кўрсатиб қўйиши мумкинлиги ҳақида огоҳлантирган.
Мамлакатда вазият барибир кескинлашишда давом этди ва Қозоғистон президенти ҳукумат истеъфосини қабул қилди. 5 январнинг иккинчи ярмида Тўқаев Қозоғистон халқига яна видеомурожаат йўллади ва Хавфсизлик кенгаши раисининг ваколатларини ҳам қабул қилиб олгани, мамлакатдаги намойишлар ортида молиявий қўллаб-қувватланаётган фитначилар турганини маълум қилди.
Тўқаев фуқароларга йўллаган мурожаатида мамлакатдаги оммавий тартибсизликлар пайтида ҳалок бўлганлар ва жароҳатланганлар борлигини ҳам айтган.
Изоҳ (0)