Qozog‘iston prezidenti Qosim-Jo‘mart To‘qayev fuqarolarga yo‘llagan murojaatida mamlakatdagi ommaviy tartibsizliklar paytida halok bo‘lganlar va jarohatlanganlar borligi haqida gapirdi. Siyosatchining murojaati “Xabar 24” davlat telekanalida namoyish etilgan, deb yozadi “Interfaks”.

Foto: Sputnik

“Halok bo‘lganlar va yaralanganlar bor, bosqinchi unsurlar olomoni harbiy xizmatchilarni kaltaklamoqda, masxara qilib, ko‘chalarda yalang‘och holda haydamoqda, ayollarni haqoratlab, do‘konlarni talon-toroj qilmoqda. Vaziyat barcha Olmaota aholisi xavfsizligiga tahdid solmoqda. Bunga esa toqat qilib bo‘lmaydi. Olmaotadan tashqari yana bir qancha markazlarda ham vaziyat keskinlashgan, shu munosabat bilan men bir qator hududlarda favqulodda holat e’lon qildim”, — dedi Qozog‘iston prezidenti.

To‘qayev halok bo‘lganlar va yaradorlarning soniga aniqlik kiritmadi. U namoyishchilarga qarshi imkon qadar qattiqqo‘llik bilan ish olib borishga va’da berdi.

Tengrinews Qozog‘iston Ichki ishlar vazirligi ma’lumotlariga tayanib, tartibsizliklar chog‘ida 8 nafar politsiyachi va Milliy gvardiya askari halok bo‘lganini xabar qildi. Yana 317 kishi jarohatlangan. Vazirlik bayonotida bosqinchilik va talon-taroj qilish harakatlari provokatorlar tomonidan uyushtirilgani aytilgan. “Olomon qo‘lidan yuzlab odamlar jabr ko‘rdi”, — deya Ichki ishlar vazirligi qozog‘istonliklarni provokatsiyalarga berilmaslikka chaqirdi.

Avvalroq Olmaota politsiyasi shaharda 120 dan ortiq avtomobil, jumladan, 33 ta politsiya mashinalari yoqib yuborilgani, 120 ta do‘kon, 180 ta umumiy ovqatlanish shoxobchasi, 100 ga yaqin idora vayron qilingani haqida xabar bergan edi. Shuningdek, 500 dan ortiq odam kaltaklangani aytilgan.

“Xabar 24” telekanali Jamoat sog‘liqni saqlash boshqarmasiga tayanib, Olmaotada 190 kishi shifokorlarga murojaat qilgani haqida xabar bergan. Ulardan 40 nafari kasalxonaga yotqizilgan, yana yetti nafar jabrlanuvchi reanimatsiyada. Yaralanganlar orasida 137 nafar politsiya xodimi va 53 nafar tinch aholi vakillari bor, deyiladi xabarda.