Конгода шарқида жойлашган дунёдаги энг фаол вулқонлардан бири ҳисобланувчи Нйирагонго осмонга қора тутун ва вулқон кулини отишни бошлади, деб хабар беради BBC.
Кузатувчилар Нйирагонгонинг асосий кратеридаги ҳарорат Цельсий бўйича 400 даражага етганини ва ерости силкинишлари сезиларли даражада ортганини қайд этган.
Шу билан бирга, Селестин Касерека обсерваторияси раҳбари вулқоннинг отилиш эҳтимоли ҳозича жуда камлигини, бироқ вулқон тутуни ва кули аҳоли соғлиғига хавф туғдириши мумкинлигини маълум қилган.
«Аҳолига хотиржамликни сақлаш тавсия этилмоқда, бироқ одамлар қўрқувда, чунки улар 2021 йилнинг майида отилган вулқоннинг ҳалокатли оқибатларини ҳанузгача унутгани йўқ», — дейилади хабарда. Ўшанда табиий офат оқибатида 32 киши ҳалок бўлган, минглаб одамлар янги бошпана қидиришга мажбур бўлганди. Фуқароларнинг аксарияти қўшни Руандага қочган бўлса, айримлари ҳамон Гома шаҳридаги вақтинча лагерда яшаб келмоқда.
Маълумот учун, ушбу вулқон 1882 йилдан буён 34 марта отилган. Нйирагонгонинг энг кучли отилишларидан бири 1977 йилда қайд этилган, ўшанда 600 дан ортиқ одам ҳалок бўлган.
Изоҳ (0)