Канаданинг Онтарио провинцияси суди 2020 йилда Теҳронда Украина халқаро ҳаво йўллари самолётининг уриб туширилиши оқибатида ҳалок бўлган олти нафар канадаликнинг оилаларига Эрондан 107 миллион доллар товон пули ундириш ҳақида ҳукм чиқарди. CBC телеканали хабарига кўра, қарор 31 декабрь куни қабул қилиниб, 4 январь куни эълон қилинган.
Эслатиб ўтамиз, Украина халқаро авиакомпаниясининг Boeing 737 самолёти 2020 йил 8 январга ўтар кечаси Теҳрон аэропортидан ҳавога кўтарилганидан сўнг ҳалокатга учраган. Ҳодиса Эрон армияси генерал Қосим Сулаймонийнинг ўлдирилишига жавобан АҚШнинг Ироқдаги базаларига ракета ҳужуми уюштирган пайтда юз берган. Самолёт бортида 176 киши — Эрон, Канада, Буюк Британия, Германия, Швеция, Афғонистон ва Украина фуқаролари бўлган. Уларнинг ҳеч бири тирик қолмаган.
Эрон дарҳол авиаҳалокатга техник носозлик сабаб бўлганини айтган. Кейинчалик 11 январь куни Эрон мамлакат ҳаво мудофааси самолётни операторнинг хатоси туфайли уриб туширилганини тан олган ва ҳалок бўлганларнинг оила аъзоларига компенсация тўлашини маълум қилган. Бир муддатдан сўнг Эрон ташқи ишлар вазири Муҳаммад Жавод Зариф самолётни тасодифан уриб туширган аскар қамоқда эканини айтган.
Эроннинг собиқ президенти Ҳасан Руҳоний воқеани кечириб бўлмайдиган хато деб атаган ва уриб туширилган самолёт учун Украинадан кечирим сўраган.
Изоҳ (0)