Ўзбекистонда миллий ижтимоий тармоқ ва мессенжерлар яратилади

Ўзбекистонда фуқароларнинг шахсий маълумотларини ҳимоялаш мақсадида замонавий коммуникацион дастурлар ҳамда миллий ижтимоий тармоқ ва мессенжерлар яратади. Бу ҳақда «Янги Ўзбекистоннинг 2022–2026 йилларга мўлжалланган тараққиёт стратегияси тўғрисида»ги президент фармони лойиҳасида сўз боради.

Хусусан, унга кўра 2022 йил декабрга қадар миллий ижтимоий тармоқ ва мессенжерлар ҳамда ахборот коммуникацион дастурлар яратиш ишлари олиб борилади. Бунда:

• соҳанинг етук мутахассислари ва йирик тадбиркорларни миллий коммуникация платформаларини яратишга жалб қилиш;
• маълумотларни узатиш ва қайта ишлашнинг замонавий талабларига мос дастурий таъминот ва техник воситалар билан таъминлаш кўзда тутилган.

Шунингдек, АКТ соҳасида миллий маҳсулот яратиш тизимини рағбатлантириш ва қўллаб-қувватлашнинг самарали механизмларини ишлаб чиқиш бўйича амалий чора-тадбирлар ҳам амалга оширилади. Бунда яратилган дастур ҳамда миллий ижтимоий тармоқ ва мессенжерларни аудиториясининг қамрови ортишига қараб солиқ имтиёзларни бериш тизими йўлга қўйилади.

Бундан ташқари, миллий коммуникация платформаларини аҳоли орасида оммалаштирилади. Бунда:

• миллий ижтимоий тармоқ ва мессенжерларни замонавий дизайн ҳамда техник талаблар асосида янгилаб боришни йўлга қўйилади;
• аҳоли ўртасида миллий ижтимоий тармоқ ва мессенжерларни тарғиботи бўйича амалий чоралар кўрилади;
• фуқароларнинг шахсий маълумотлари хавфсизлигини таъминланади.

Маълумот учун, 2018 йилнинг майида «Muloqot.uz» ижтимоий тармоғи ўз фаолиятини вақтинчалик тўхтатишини маълум қилганди. Мазкур ижтимоий тармоқ 2011 йили Simple Networking Solutions МЧЖ томонидан ишга туширилган эди. У бошқа муқобиллардан бир қанча жиҳатлари, жумладан, рус ва ўзбек тиллардаги интерфейс, SMS-интерфейс, Tas-IX зонасида эканлиги ва ҳоказолар билан фарқ қиларди.Эслатиб ўтамиз, 2021 йилнинг май ва июнь ойларида «Ўзкомназорат» матбуот хизмати «ВКонтакте», Twitter, WeChat, Skype ва TikTok сервислари маъмуриятларига «Шахсга доир маълумотлар тўғрисида»ги қонуннинг 27-1-моддаси талабларга риоя этилишини таъминлаш чораларини кўриш юзасидан кўрсатмалар берганди.

Июль ойига келиб Ўзбекистонда TikTok ва Twitter’нинг очилиши секинлашди. 2 июль куни эса Ўзбекистонда айрим ижтимоий тармоқлар, хусусан, TikTok’дан фойдаланиш расман чекланди. Кейинчалик «Миллий тикланиш» демократик партияси Марказий кенгаши раиси ўринбосари Феруза Муҳаммаджонова TikTok ижтимоий тармоғини бутунлай блоклашни таклиф қилди.