Тошкент вилояти ҳокимлиги ижтимоий тармоқларда «Чимён дам олиш маскани»га қўлбола тўсиқлар қўйилган юзасидан тарқалган хабарларга муносабат билдирди.
Ижтимоий тармоқларда халқ орасида «Чимён дам олиш маскани» деб ҳам юритиладиган ҳудудда дам олувчиларнинг эътирозлари акс этган видеолавҳа тарқалди. Ҳокимлик изоҳида келтирилишича, бу ердаги қўлбола тўсиқлар вақтинчалик чора сифатида ўрнатилган, айни пайтда дам олувчилар билан боғлиқ кўнгилсиз ҳолатлар юз бергани ҳақида маълумотлар йўқ.
«Бугунги кунда дам олиш масканига ташриф буюраётган маҳаллий ва хорижий сайёҳларнинг хавфсизлигини таъминлаш мақсадида тегишли мутасадди ташкилотлар иштирокида ишчи гуруҳ ташкил қилинган ва ҳудуддаги (от, квадратцикл, сноуборт, тюбинг, чанғи ва бошқа) кўнгилочар спорт турлари билан шуғулланувчи спорт ихлосмандлари ва якка тартибдаги дам олувчилар ўртасида турли хил кўнгилсиз ҳолатлар юзага келишининг олдини олиш чоралари кўрилмоқда», — дейилади муносабатда.
Маълумот учун, Ўзбекистон президентининг тегишли қарорига асосан Бўстонлиқ тумани Чимён қишлоғидаги «Пахтакор спорт базаси» спортнинг қишки ва мураккаб техник турлари бўйича Республика олий спорт маҳорати мактаби балансига ўтказилган.
Эслатиб ўтамиз, Янги йил байрами муносабати билан эълон қилинган дам олиш кунлари Тошкент вилоятининг Бўстонлиқ туманига кўплаб фуқаролар ташриф буюриши кутилаётгани сабабли автомобиль йўлларида тирбандликларнинг олдини олиш ва ҳаракат хавфсизлигини таъминлаш мақсадида, 2021 йил 31 декабрдан 2022 йил 5 январга қадар Бўстонлиқ туманининг дам олиш зоналаридан ўтган автомобиль йўлларида ҳаракатланиш учун айрим чекловлар киритилганди.
Изоҳ (0)