O‘zbekistonda milliy ijtimoiy tarmoq va messenjerlar yaratiladi

O‘zbekistonda fuqarolarning shaxsiy ma’lumotlarini himoyalash maqsadida zamonaviy kommunikatsion dasturlar hamda milliy ijtimoiy tarmoq va messenjerlar yaratadi. Bu haqda “Yangi O‘zbekistonning 2022–2026-yillarga mo‘ljallangan taraqqiyot strategiyasi to‘g‘risida”gi prezident farmoni loyihasida so‘z boradi.

Xususan, unga ko‘ra 2022-yil dekabrga qadar milliy ijtimoiy tarmoq va messenjerlar hamda axborot kommunikatsion dasturlar yaratish ishlari olib boriladi. Bunda:

• sohaning yetuk mutaxassislari va yirik tadbirkorlarni milliy kommunikatsiya platformalarini yaratishga jalb qilish;
• ma’lumotlarni uzatish va qayta ishlashning zamonaviy talablariga mos dasturiy ta’minot va texnik vositalar bilan ta’minlash ko‘zda tutilgan.

Shuningdek, AKT sohasida milliy mahsulot yaratish tizimini rag‘batlantirish va qo‘llab-quvvatlashning samarali mexanizmlarini ishlab chiqish bo‘yicha amaliy chora-tadbirlar ham amalga oshiriladi. Bunda yaratilgan dastur hamda milliy ijtimoiy tarmoq va messenjerlarni auditoriyasining qamrovi ortishiga qarab soliq imtiyozlarni berish tizimi yo‘lga qo‘yiladi.

Bundan tashqari, milliy kommunikatsiya platformalarini aholi orasida ommalashtiriladi. Bunda:

• milliy ijtimoiy tarmoq va messenjerlarni zamonaviy dizayn hamda texnik talablar asosida yangilab borishni yo‘lga qo‘yiladi;
• aholi o‘rtasida milliy ijtimoiy tarmoq va messenjerlarni targ‘iboti bo‘yicha amaliy choralar ko‘riladi;
• fuqarolarning shaxsiy ma’lumotlari xavfsizligini ta’minlanadi.

Ma’lumot uchun, 2018-yilning mayida “Muloqot.uz” ijtimoiy tarmog‘i o‘z faoliyatini vaqtinchalik to‘xtatishini ma’lum qilgandi. Mazkur ijtimoiy tarmoq 2011-yili Simple Networking Solutions MChJ tomonidan ishga tushirilgan edi. U boshqa muqobillardan bir qancha jihatlari, jumladan, rus va o‘zbek tillardagi interfeys, SMS-interfeys, Tas-IX zonasida ekanligi va hokazolar bilan farq qilardi.Eslatib o‘tamiz, 2021-yilning may va iyun oylarida “O‘zkomnazorat” matbuot xizmati “VKontakte”, Twitter, WeChat, Skype va TikTok servislari ma’muriyatlariga “Shaxsga doir ma’lumotlar to‘g‘risida”gi qonunning 27-1-moddasi talablarga rioya etilishini ta’minlash choralarini ko‘rish yuzasidan ko‘rsatmalar bergandi.

Iyul oyiga kelib O‘zbekistonda TikTok va Twitter’ning ochilishi sekinlashdi. 2-iyul kuni esa O‘zbekistonda ayrim ijtimoiy tarmoqlar, xususan, TikTok’dan foydalanish rasman cheklandi. Keyinchalik “Milliy tiklanish” demokratik partiyasi Markaziy kengashi raisi o‘rinbosari Feruza Muhammadjonova TikTok ijtimoiy tarmog‘ini butunlay bloklashni taklif qildi.