Ўзбекистонда энергия ресурслари ва табиий газ бозорларини эркинлаштириб, соҳага хусусий инвестицияларни кенг жалб қилиш ҳамда эҳтиёжманд аҳолини ҳимоя қилиш учун ижтимоий истеъмол нормалари киритилади. Бу ҳақда 2022–2026 йилларга мўлжалланган тараққиёт стратегиясини 2022 йилда амалга ошириш бўйича «Йўл харитаси» лойиҳасида сўз боради.
Ҳужжат лойиҳасига кўра, мамлакатда энергетика соҳасида соғлом рақобат муҳитини ривожлантириш, барча иштирокчиларга тенг имкониятлар бериш ва нархларни шакллантиришнинг шаффоф механизмлари жорий этилади.
Бунда, электр энергияси ва табиий газнинг рақобатли бозорини тартибга солувчи мустақил орган — регуляторни, ягона харид қилувчи функциясини бажарувчи компанияни, миллий диспетчерлик марказини ташкил қилишни назарда тутади.
Халқаро молия институтларининг (Осиё тараққиёт банки, Жаҳон банки) экспертлар ва консултантлар билан биргаликда қуйидаги норматив-ҳуқуқий ҳужжатларни ишлаб чиқилади:
- янги таҳрирдаги «Электр энергетикаси тўғрисида»ги қонун лойиҳаси;
- «Табиий газ тўғрисида»ги қонун лойиҳаси;
- Магистрал электр тармоқлари кодексини (GrId Code) тасдиқлаш тўғрисида;
- тақсимловчи тармоқларни эксплуатация қилиш, истеъмолчиларни тармоққа улаш, томонларнинг ҳуқуқ ва мажбуриятларини белгилашни назарда тутган ҳолда техник жиҳатдан тартибга солиш соҳасидаги норматив ҳужжатларни ўзида мужассамлаштирган Тақсимлаш тармоқлари қоидаларини (Distribution Code) тасдиқлаш тўғрисида ҳукумат қарори;
- электр энергетикаси бозор иштирокчилари фаолиятини тартибга солишни назарда тутувчи «Бозор қонун-қоидалари тўғрисида» ҳукумат қарори;
- табиий газ таъминоти тизимини ислоҳ қилиш ва рақобат бозорини босқичма-босқич шакллантириш тўғрисида президент қарори.
- халқаро экспертлар ва молия институтлари кўмагида мазкур йўналишда халқаро тажрибани ўрганиш ва таҳлил қилиш;
- эҳтиёжманд аҳоли учун энергия ресурсларини ижтимоий истеъмол нормалари бўйича асосланган таклифларни ишлаб чиқиш;
- келишилган таклифларни (табақалашган тарифларни жорий этиш юзасидан) Вазирлар Маҳкамасига киритиш ва режа-жадвални қабул қилиш режалаштирилган.
Изоҳ (0)