Buxoro viloyatida 31-dekabr kuni Turkiyaning “Aksa Enerji” kompaniyasi tomonidan qurilgan issiqlik elektro stansiyasi ishga tushirildi. Bu haqda Energetika vazirligi xabar qildi.

Foto: Energetika vazirligi

Ma’lum qilinishicha, gaz-porshenli IESning quvvati 270 megavattni tashkil etadi. Hozirda mazkur stansiyani O‘zbekistonning yagona elektr tarmog‘iga ulash bo‘yicha ishlar olib borilmoqda. Stansiya tez orada tarmoqqa quvvat uzatishni boshlaydi.

Ushbu stansiya Buxoro viloyatida birinchisi hisoblanadi. Yiliga 2,2 milliard kilovatt/soat elektr energiyasi ishlab chiqaradi.

Loyiha qurilmalarining foydali ish koeffitsiyentining yuqoriligi hisobiga yillik 260 million metr kub tabiiy gaz tejaladi. Tejalgan tabiiy gazga qo‘shimcha 900 million kilovatt-soat elektr energiyasi ishlab chiqarish imkoni yaratiladi, buning natijasida 450 ming xonadon elektr energiyasi bilan ta’minlanadi.

Qurilish davomida 500 nafar ishchi-xodim faoliyat yuritgan bo‘lsa, loyiha ishga tushishi natijasida tumanda 100 nafar yangi ish o‘rni yaratilgan.

Eslatib o‘tamiz, Shavkat Mirziyoyev Buxoro viloyatda shamol, quyosh va issiqlik elektr stansiyalari qurilishini aytgandi. “1,6 milliard dollar to‘g‘ridan to‘g‘ri xorijiy investitsiya hisobidan 4 ta shamol, quyosh va issiqlik elektr stansiyasi barpo etiladi. Ushbu stansiyalar yiliga 6,3 milliard kilovatt-soat yoki viloyat ehtiyojiga nisbatan ikki barobar ko‘p elektr energiyasi ishlab chiqaradi.  Jumladan, 2023-yilda Peshku va G‘ijduvonda jami quvvati 1 ming megavatt bo‘lgan 2 ta shamol elektr stansiyasi quriladi”, — deya qayd etgan davlat rahbari.