Ақтау халқаро аэропорти халқаро парвозларни қабул қилишни ва амалга оширишни ёпганлиги муносабати билан 2022 йил 5 январь куни амалга оширилиши режалаштирилган HY-9725/9726 Урганч—Ақтау—Урганч йўналиши бўйича мунтазам қатновлар бекор қилинди. Бу ҳақда Uzbekistan Airways матбуот хизмати хабар берди.
Таъкидланишича, ушбу йўналиш бўйича парвозларни амалга ошириш кунлари ҳақидаги қўшимча маълумот кейинроқ тақдим этилади.
«Йўловчилар 5 январь кунига Ақтауга бекор бўлган парвозлар авиачипталарининг тўлиқ қийматини чипта сотиб олинган жойда қайтариб олиш ёки бошқа санага бепул қайта бронлаш ҳуқуқига эгадирлар», — дейилади хабарда.
Аввалроқ кучли туман Ўзбекистонда аэропортлар фаолиятини чеклаб қўйгани, Uzbekistan Airways Express Намангандан Россиянинг 8 та шаҳрига парвозларни йўлга қўйиши, Минскдан Тошкентга учган самолёт техник носозлик сабаб аэропортга қайтишга мажбур бўлгани тўғрисида хабар берилганди.
Эслатиб ўтамиз, 2 январдан бери Қозоғистонда намойишлар бўлиб ўтмоқда. У Қозоғистоннинг Мангистау вилояти Жанаозен шаҳрида автомобиль эгалари суюлтирилган газ нархи икки бараварга (60 тенгедан 120 тенгега) кўтарилганидан норози бўлиб, оммавий митингга чиқиши билан бошланган эди. Шундан кейин намойишлар Ақтау вилояти марказида ҳам бўлиб ўтди, сўнгра Қозоғистоннинг бошқа ҳудудларига, жумладан, пойтахт Нур-Султон шаҳрига ва собиқ пойтахт Олмаотага ҳам тарқала бошлади.
Изоҳ (0)