Грузиянинг собиқ президенти Михаил Саакашвили хорижлик шифокорларнинг уни кўрикдан ўтказишига рухсат берилишини, шунингдек, адвокатлар билан ишончли мулоқот қилиш ҳуқуқини талаб қилмоқда. Акс ҳолда, 6 январь куни сиёсатчи яна очлик эълон қилади, деди унинг адвокати Шота Тутберидзе журналистларга.
«Биз зудлик билан Михаил Саакашвилини даволаш жараёни давом эттирилишини ва унинг олдига АҚШ, Украина ва Нидерландиядан келган шифокорларнинг қўйилишини талаб қиламиз. Бизда Михаил Саакашвили билан конфиденсиал мулоқот қилиш имконияти йўқ, бу эса адвокат ва мижознинг асосий ҳуқуқларини бузишдир», — деди Тутберидзе.
30 декабрга ўтар кечаси Саакашвили «куч билан» ҳарбий госпиталдан алоҳида маҳбуслар учун мўлжалланган Рустави шаҳридаги махсус ҳибсхонага кўчирилгани хабар қилинганди. Қамоқхонага қайтарилгандан сўнг сиёсатчи тарафдорларига биринчи мурожаатини йўллади. Мурожаатида Саакашвили ҳозир унинг учун «реабилитация»дан кейин ўзини тиклаб, «ҳужум»га тайёргарлик кўриш муҳим эканини айтган.
Шу билан бирга адвокати Саакашвилининг аҳволи оғир экани, у ўзи мустақил овқатлана олмаётганини маълум қилган.
Собиқ президент Грузияга 2021 йил октябрь ойи бошида мамлакатдаги мунисипал сайловларнинг биринчи босқичидан сал олдин келган, шундан сўнг у ҳибсга олинган. Қамоқхонада у ўзини сиёсий маҳбус деб ҳисоблагани учун очлик эълон қилган. Соғлиғи ёмонлашгани сабабли сиёсатчи аввалига қамоқхона касалхонасига, кейин эса Гори шаҳридаги ҳарбий госпиталга ётқизилган. 20 ноябрь куни у очликни тўхтатганини эълон қилди.
Саакашвили 2013 йилда Грузияни тарк этган, шундан сўнг мамлакатда унга қарши тўртта жиноий иш қўзғатилган, шундан иккитасида сиёсатчи сиртдан уч ва олти йиллик қамоқ жазосига ҳукм қилинган. Саакашвили устидан суд 2007 йил 7 ноябрдаги митингни зўравонлик билан тарқатиб юбориш ва «Имеди» телекомпанияси офисини вайрон қилиш ҳамда қарийб 9 миллион лари (2,9 миллион доллардан ортиқ) давлат маблағларини талон-тарож қилиш иши бўйича олиб борилмоқда. 2021 йилнинг 20 октябрида Саакашвили чегарани ноқонуний кесиб ўтишда айбланган, бу ҳолатда у беш йилгача қамоқ жазосига ҳукм қилиниши мумкин.
Изоҳ (0)