Uch kun oldin harbiy gospitaldan qamoqxonaga qaytarilgan Gruziya sobiq prezidenti Mixail Saakashvilining ahvoli og‘ir, u o‘zi mustaqil ovqatlana olmayapti. Bu haqda siyosatchining advokati Shota Tutberidze ma’lum qildi, deb yozadi “Gruziya onlayn”.
“Sog‘lig‘i, tabiiyki, bunday sharoitda yaxshilanmaydi va hanuz og‘irligicha qolmoqda. U amalda ovqat ham yeya olmaydi, davolanish kursi tugallanmagan. Tibbiy ko‘rsatkichlari ham har tomonlama murakkab”, — deydi advokat.
Tutberidzening so‘zlariga ko‘ra, hozirda Saakashvilining vazni u ochlikni tugatgan vaqtga qaraganda kamayib ketgan, chunki uning reabilitatsiya kursi tugamagan. Bundan tashqari, advokatning aytishicha, mahbus siyosatchiga shaxsiy shifokori bilan ko‘rishishga ruxsat berilmagan, Saakashviliga o‘zining advokatlari bilan xat almashish ham taqiqlangan.
Tutberidzening qo‘shimcha qilishicha, qiyinchiliklarga qaramay, sobiq prezident “jangga shay va bu kurashda gruzin xalqi g‘alaba qozonmaguncha kurashishda davom etishni maqsad qilgan”.
30-dekabrga o‘tar kechasi Saakashvili jismoniy qarshilik ko‘rsatganiga qaramay, “kuch bilan” mamlakat Mudofaa vazirligi gospitalidan alohida mahbuslar uchun mo‘ljallangan Rustavi shahridagi maxsus hibsxonaga ko‘chirilgani xabar qilingandi.
Qamoqxonaga qaytarilgandan so‘ng siyosatchi tarafdorlariga birinchi murojaatini yo‘lladi. Murojaatida Saakashvili hozir uning uchun “reabilitatsiya”dan keyin o‘zini tiklab, “hujum”ga tayyorgarlik ko‘rish muhim ekanini aytgan.
Mavzuga doir:
- Mixail Saakashvili ochlikning 49-kunida hushidan ketdi. U qamoqxona shifoxonasining jonlantirish bo‘limiga yotqizilgan
- Saakashvilining shifokori uning sog‘lig‘i keskin yomonlashganini ma’lum qildi
- Saakashvilini ko‘rikdan o‘tkazgan shifokorlar guruhi uning qamoqxona shifoxonasida davolanishini maqsadga muvofiq emas deb topdi