Байден Зеленскийга Россия Украинага бостириб кирадиган бўлса АҚШ ва унинг иттифоқчилари «тегишли жавоб» қайтаришини ваъда қилди

АҚШ президенти Жо Байден 2 январь куни Украина президенти Владимир Зеленский билан телефон орқали мулоқот қилди. Суҳбат чоғида Байден Зеленскийни Россия Украинага бостириб кирадиган бўлса, Вашингтон ва унинг иттифоқчилари бунга қатъий жавоб беришга тайёр эканига ишонтирди. Бу ҳақда Оқ уй матбуот хизмати суҳбатдан сўнг маълум қилди.

«Президент Байден, агар Россия Украинага бостириб кирса, АҚШ, унинг иттифоқчилари ва ҳамкорлари қатъий жавоб беришини айтди», — дейилади баёнотда.

Шунингдек, ҳар иккала етакчи НАТО—Россия ҳамда Европа хавфсизлик ва ҳамкорлик Ташкилоти (ЕХҲТ) кенгаши доирасида бўлиб ўтадиган Россия ва АҚШ ўртасидаги хавфсизлик бўйича музокараларни қўллаб-қувватлашини билдирди. Декабрь ойи охирида Байден Россия президенти Владимир Путин билан бўлажак музокараларни муҳокама қилганди.

Зеленский Twitter’да Байден билан музокаралар чоғида Украина, АҚШ ва ҳамкорларнинг Европада тинчликни сақлаш, янада кескинлашувга йўл қўймаслик, ислоҳотлар ва «деолигархизация» бўйича қўшма ҳаракатларини муҳокама қилганини ёзган.

Европада хавфсизлик кафолатлари бўйича музокаралар Ғарб ОАВларининг Украина билан чегарада Россия қўшинлари тўплангани ва Россиянинг эҳтимолий босқини ҳақидаги хабарлари ортидан бошланди.

Москва бу маълумотларни рад этиб, Украинадаги ҳарбий ҳаракатларга тайёргарлик ҳақидаги хабарларни «қуруқ, асоссиз кескинлик» деб атамоқда. Қолаверса, Россия Ғарб давлатларидан НАТОнинг шарққа томон кенгаймаслиги, Украина эса бу ташкилотга қабул қилинмаслиги ҳақида кафолат талаб қилди.

Европадаги хавфсизлик кафолатлари, Украинадаги вазият ва Москванинг талаблари январь ойида бўлиб ўтадиган халқаро музокаралар мавзуси бўлиши кутилмоқда. 10 январь куни Женевада Россия ва АҚШ ўртасидаги музокаралар, 12 январда Брюсселда Россия—НАТО кенгаши йиғилиши, 13 январда Венада ЕХҲТ доимий кенгашининг йиғилиши режалаштирилган.