Сўнгги марта қачон театрга бордингиз? Бу саволга дарҳол жавоб берадиганлар жуда озчиликни ташкил этиши аниқ. Чунки томошабинлар аввалгидек театрларга серқатнов эмас, ўз хоҳиши билан спектаклга келадиганлар эса бармоқ билан санарли. Хўш, пойтахт театрларидаги энг томошабоп спектакллар ва уларнинг чипта нархи қанча?
Ботир Муҳаммаджонов — Ўзбек миллий академик драма театри труппа раҳбари:
— Айни кунларда театримиздаги энг томошабоп спектакллар: «Андишали келинчак», «Кўнгил», «Келди-ю, кетди», «Уруш одамлари» ва «Ўзгалар дарди» ҳисобланади. Дам олиш кунлари мазкур спектаклларга чипта топиш муаммо. Ўзбекистон халқ артисти Дилбар Икромованинг вафотидан сўнг «Ўзбекча рақс» спектаклининг намойиши вақтинча тўхтатилганди. Декабрь ойидан бошлаб спектакль яна саҳнага қайтди. Эндиликда асосий ролни Малика Иброҳимова ва Маҳфуза Боботиллаевалар ижро этишяпти.
Кейинги пайтларда комедия жанридаги асарларга талаб юқори. Дам олиш кунлари намойиш этиладиган «Андишали келинчак» ва «Кўнгил» спектаклларига бир неча ҳафта олдин чипталар сотуви тугатилади.
«Андишали келинчак» спектаклининг илк премьераси 2005 йилнинг 15 июнь санасида ўтказилган. Шу кунгача неча марта намойиш этилганлиги ҳақидаги аниқ маълумот йўқ. Эркин Хушвақтов асари асосида саҳналаштирилган спектаклда бош ролларни: Дилноза Кубаева, Шодия Тўхтаева, Рихситилла Абдуллаев, Аваз Қодиров, Саида Раметова, Шоҳида Исмоилова ва Хосият Ҳусанова каби эл ардоғидаги актёрлар жамоаси ижро этишади.
Спектакль ҳақида қисқача: Асар Олмахон исмли ёш келинчакнинг ўзга хонадонга мослашиб кетиши ҳақида ҳикоя қилади. Келинчакни қайнонаси хушламайди, шу боис оилада зиддиятли вазиятларга учрайди. Ҳатто қайнона келинини туғмасликда айблаб, ўғлини бошқа қизга уйлантирмоқчи бўлади. Икки ёш эса бахт учун курашиб, онанинг кўнглига йўл топишади.
«Кўнгил» спектаклининг премьераси 2015 йилнинг 8 апрель санасида ўтказилган. Асар муаллифи Эркин Хушвақтов «Кўнгил»ни Ўзбекистон халқ артисти Муқаддас Холиқованинг таклифига кўра ёзган. Драматург асарни ёзишда шоира Марҳабо Каримованинг шеъридан илҳомланганини ҳам яширмайди. Бош ролларни Муқаддас Холиқова, Фарҳод Абдуллаев, Шаҳло Темирова, Бахтиёр Юсуповлар ижро этишган.
Спектакль ҳақида қисқача: Аёлга турмуш ўртоғи гулдаста олиб келади. Бундан қувонган аёлнинг дунёга бўлган қарашлари ўзгаради. Ташқи кўринишига эътибор бериши лозимлигини англаб етади. У аввалгидан гўзаллашади. Турмуш ўртоғига бўлган муносабатлари ҳам ўзгаради. Аммо эркак аёлни қувонтирган гулни харид қилмагани ва уни йўлакдан топиб олганини айтади. Спектакль сўнгида эркак оилавий муносабатларнинг яхшиланишида эътиборнинг нақадар катта кучга эгалигини тушуниб етади.Чипталар 30 000 – 50 000 сўмгача бўлган нархда сотилади.
Хайрулла Иноғомов — Муқимий номидаги Ўзбекистон давлат мусиқали театрининг томошабинлар билан ишлаш бўйича директор ўринбосари:
— Шу кунгача театримиздаги энг аншлаг спектакль «Супер қайнона» бўлган. У 20 йилга яқин намойиш этилиб, икки йил аввал рэпертуардан олиб ташланди. Ҳозирги кунда «Антиқа совчилар», «Ақлдан озиш ҳеч гапмас», «Асл хазина» ва «Олифталар» спектаклига талаб бирмунча юқори.
Спектакльларимизга билет топиш муаммо эмас. Дам олиш кунлари 400 кишилик томоша зали мухлислар билан тўлади, қолган кунлари эса 100-200 киши ташриф буюради. Ихтиёрий ташриф буюрувчилар камлиги учун корхона ва ташкилотлар билан ҳамкорликда ишлашимизга тўғри келади.
«Антиқа совчилар» спектакли Исфандиёр қаламига мансуб бўлиб, бош ролларни Меҳри Бекжонова, Гулчеҳра Носирова, Турғун Бекназаров, Хайрулла Иногомов, Малика Қаюмова, Махсуда Отажонова каби актёрлар жамоаси ижро этишади.Спектакль ҳақида қисқача: Иззат ака қизи Наргизага келган совчилардан бирини танлолмай боши қотади. У қизига ошиқ бўлган Бахтиёрга қизини турмушга беришни истамайди. Бир куни Иззат аканинг тушига раҳматли отаси кириб, набирасини Бахтиёрга турмушга берса, бахтли бўлиши ҳақида айтади. Шу кундан бошлаб ота Бахтиёрнинг ҳаётига қизиқади. У яширинча бўлса-да, йигитга Наргизага уйланишни таклиф қилади. Спектакль икки ёшнинг бахт оқшоми билан якунланади.Чипталар 10 000 – 40 000 сўмгача бўлган нархда сотилади.
Учқун Ўсаров — Ўзбекистон давлат драма театри адабий эмакдоши:
— Айни кунларда театримиз асосан ёш томошабинлар учун «Янги йил эртаги» спектаклини намойиш этмоқда. Тан олиш керак, спектакль томошаларига ташриф буюрувчилар ниҳоятда кам. Шу боис мактаб, институт ва корхоналар билан ҳамкорликда ишлашимизга тўғри келади. «Аяжонларим», «Минг йиллик ҳангома». «Қайтар дунё» ва «Вафодор» сингари спектаклларимиз томошабинлар эътиборидан четда қолаётгани кўнгилни хира қилади.
«Йиллар армони» — Ўзбекистон Қаҳрамони Абдулла Ориповнинг 80 йиллиги муносабати билан драматург Учқун Ўсаров қаламига мансуб, режиссёр Расулжон Тоғайқулов томонидан саҳналаштирилган. Унда бош ролларни Пўлат Норматов, Шукуржон Сўфиев, Мадина Тўхтаева, Маҳбуба Хуррамова каби актёрлар ижро этишган. Асарда Абдулла Ориповнинг ҳаёт ва ижоди билан боғлиқ воқеалар кўрсатилади. Бундан ташқари, шоирнинг машҳур шеърлари ёзилишига туртки бўлган воқеалар ҳам спектакль сюжетига киритилган.
Чипталар 10 000 – 40 000 сўмгача бўлган нархда сотилади. Келишувга кўра мактаб ўқувчилари ва талабалар учун махсус чегирмалар мавжуд.
Қаҳрамон Мелиев — Ўзбек давлат сатира театри директори ўринбосари:
— Театр биноси чекка ҳудудда жойлашгани учун томошабинларнинг келиши ҳавас қилгудек эмас. Кўп ҳолларда 300 ўринли томоша залига 50-100 та томошабинлар келишади. Бармоқ билан санарли томошабинлар учун спектакль қўйган пайтларимиз ҳам кўп бўлган. Айни кунларда театримизда «Жулқунбой», «Уйланиш», «Доктор фалсафаси» каби спектакллар намойиш этилмоқда. Болажонлар учун «Қор маликаси» спектакли саҳналаштирилган. Бу спектаклга мактаб ва корхоналар билан ҳамкорликда чипталар сотилмоқда.
«Жулқунбой» — ёзувчи Абдулла Қодирийнинг кичик ҳикоялари асосида саҳналаштирилган. Унда жамиятдаги адолатсизлик, порахўрлик ва мансабпарастлик каби иллатлар аччиқ кулги остига олинади.
Чипталар 10 000 – 20 000 сўмгача бўлган нархда сотилади.
Бобур Йўлдошев — «Дийдор» театр-студияси раҳбари:
— Айни кунларда театримизда «Юлдузли тунлар», Аршин мал алан», «Мунгли кўз», «Капалак туши» каби спектакллар намойиш этилмоқда. Спектакльлар фақат шанба ва якшанба кунлари намойиш этилади. Театр биноси кичик бўлгани учун томоша залимизга 100 та одам сиғиши мумкин, аммо ҳар доим ҳам бу натижага эришмаймиз. Одатда, 60-70 та томошабин ташриф буюради.
«Дийдор» театр-студиясида чипталар бепул.
Энг қиммат чипта билан балет спектаклини томоша қиласиз
Алишер Навоий номидаги Ўзбекистон давлат академик катта театри томошабоп спектаклларни саҳналаштиришда фаол.Шу кунларда «Богема» операси 33-55 минг сўмгача, «Оққуш кўли» ва «Қарсилдоқ» балет спектаклларига эса 33-110 минг сўмгача бўлган нархда чипталар сотилмоқда. Театр бир ой давомида тахминан 5-6 балет спектаклини, 3-4 та опера спектаклини намойиш этади. Балет спектаклларининг чипталари бир ҳафта аввал харид қилиниши кўпчилик ўзбек томошабинлари учун таажжубланарли ҳол.
Болалар театрларида нима гап?
1. Ўзбек миллий қўғирчоқ театри — 25 декабрдан бошлаб «Қор маликаси» спектакли намойиш этилади. Сеанслардан олдин қорбобо ва қорқиз иштирокидаги байрам томошалари ҳам ўтказилади.Чипталар нархи 25 000 сўм.2. Ўзбекистон давлат ёш томошабинлар театри — 25 декабрдан бошлаб «Учар кема» номли саргузашт спектаклни намойиш этади. Спектакль намойишидан аввал Янги йил концерт дастури ҳам ўтказилади.Чипталар нархи 25 000 сўм.
Изоҳ (0)