O‘zbekiston xalq artisti, aktyor Shuhrat Ergashev 76 yoshida vafot etdi. Bu haqda Facebook’dagi Tashkent Retrospective sahifasi xabar berdi.

Foto: “Yandeks Dzen”

Shuhrat Ibrohimovich Ergashev 1945-yilda Toshkentda tug‘ilgan. U Toshkent teatr va rassomchilik institutining aktyorlik fakultetini tamomlagan (1968). O‘qishni tugatgach, Toshkent davlat akademik rus drama teatrida aktyor sifatida bir qator obrazlarni yaratgan.

1970-yildan “O‘zbekfilm” kinostudiyasida ish boshlagan, kino aktyori sifatida Elyor Ishmuhammedovning “Noziklik” (1966) filmida debyut qilgan.

Faoliyati davomida o‘ttizdan ortiq filmlarda rol o‘ynagan: “Dilorom” (Moni), “Qo‘mondonning qaytishi” (Mauzer), “U yolg‘iz emasdi” (Akbarov), “Qora konsulning o‘limi” (Jamol Ubaydulla), “Semurg‘” (Sherzod), “Bu yaxshi yigit” (Timur), “Men senga shahar beraman” (haydovchi), “Uchrashuvlar va ajralishlar” (Shuhrat), “Shum bola”(kinochi), “Ilk yo‘lovchilar” (Akbarov) va shular jumlasidan.

Bundan avval yozuvchi va tarjimon Olim Otaxon, Boyovut tumani hokimi o‘rinbosari Saodat Mirzayeva hamda yozuvchi Dadaxon Nuriy vafot etgani haqida xabar berilgandi.