Ўзбекистон ёшлар мукофоти, «Соғлом авлод учун» ордени соҳиби, Ўзбекистон халқ артисти, таниқли композитор ва дирижёр Шермат Ёрматов 82 ёшида вафот этди. Бу ҳақда Маданият вазирлиги матбуот хизмати хабар берди.
Шермат Ёрматов 1939 йил Фарғона вилоятида туғилган. 1967 йилда Тошкент давлат консерваториясини хор дирижёрлиги мутахассислиги бўйича тугатган. 1962—1982 йиллар давомида Тошкент шаҳридаги 99-ўрта мактабда мусиқа ўқитувчиси ва «Бойчечак» хор студиясининг раҳбари бўлган.
Шунингдек, у «Ўзтелерадио»да хор жамоаси дирижёри (1967—1970 йиллар), «Булбулча» болалар хорининг бадиий раҳбари ва бош дирижёри (1971 йил) сифатида ишлаган.
Шермат Ёрматов ўзбек болалар хорининг энг фаол тарғиботчиси, «Қўшиғим, жон қўшиғим», «Биргаликда куйлаймиз», «До, ре, ми, фа, соль», «Санъат ғунчалари» каби қатор кўрсатувлар орқали бутун республика болаларига мусиқадан таҳсил берган муаллим сифатида танилган.
Аввалроқ «Вой аламжон» қўшиғи билан машҳурликка эришган хонанда Муҳаммадкарим Соипов 58 ёшида, дубляж устаси Санжар Саъдуллаев 67 ёшида, Ўзбекистон халқ артисти Бахтиёр Ихтиёров 81 ёшида вафот этгани тўғрисида хабар берилганди.
Изоҳ (0)