Саудия Арабистони подшоҳи Салмон ибн Абдулазиз ал-Соуд Эроннинг ядровий ва баллистик ракета дастурлари бўйича халқаро ҳамжамият билан тўғри ҳамкорлик қилмаётганидан хавотирда эканини маълум қилди, деб хабар беради «Интерфакс».
«Биз унинг (Эроннинг — таҳр.) ядровий дастурлар ва баллистик ракеталарни ишлаб чиқиш бўйича халқаро ҳамжамият билан ҳамкорликни йўлга қўймаганини хавотир ила кузатиб боряпмиз», — дейди подшоҳ.
Унинг сўзларига кўра, шунингдек, хавотирга «Эрон ҳукуматининг минтақавий хавфсизлик ва барқарорликка путур етказувчи сиёсати, жумладан, мазҳабий қуролли тузилмаларни яратиш ва қўллаб-қувватлаш ҳамда унинг ҳарбий қудратини бошқа мамлакатларда тарқалиши» ҳам сабаб бўлмоқда. Подшоҳ Теҳрон ўзининг минтақадаги «салбий» хатти-ҳаракатини ўзгартиришига ҳамда диалог ва ҳамкорликни танлашига умид билдирган.
27 декабрь куни Венада Эрон ва АҚШнинг Ядро бўйича қўшма ҳаракатлар режасидаги мажбуриятларга риоя қилишга қайтиши бўйича музокараларнинг саккизинчи раунди бошланди. 28 декабрь куни IRNA агентлиги мазкур раунд 30 декабрга қадар давом этишини, шундан сўнг, иштирокчилар уч кунлик танаффус олиб, 2022 йилнинг 3 январидан музокараларни қайта тиклашини маълум қилди. АҚШ Давлат департаменти вакили Нед Прайс шу куни Америка ҳукумати ушбу раунд давомида эришилган натижаларни аҳамиятли муваффақият деб ҳисобламаслигини айтган эди.
Ядро бўйича қўшма ҳаракатлар режаси деб номланадиган келишув 2015 йил ёзида Теҳрон ҳамда бешта воситачи мамлакат ўртасида имзоланган. Кейинчалик Эроннинг мазкур келишувни қўпол равишда бузганликда айблашган. 2018 йил май ойи бошида АҚШ келишувдан бир томонлама чиқишини эълон қилган ва Эронга қарши санкциялар қайта жорий қилинганини билдирди. Эрон эса келишув шартларига ортиқ риоя қилмаслиги ва 2020 йил январдан мазкур шартномадан тўлиқ чиққанини қайд этганди.
Изоҳ (0)