Германияда 6 та атом реакторидан учтаси ёпилади

Германия ҳукумати 31 декабрга қадар мамлакатдаги сўнгги олтита атом реакторидан учтасининг ишини тўхтатмоқчи. Бу ҳақда The National нашри хабар берди.

Нашрнинг ёзишича, ҳукумат Брокдорф, Гронд ва Гундремминген станциялари 31 декабрга қадар энергия тармоғидан узилишини тасдиқлаган. Вице-канцлер Роберт Хабек халқни Европанинг энг йирик иқтисодиёти қитъадаги энергетика инқирози шароитида атом станцияларининг ишини тўхтатаётганига қарамай, энергия тақчиллиги бўлмаслигига ишонтирди.

Иқтисодиёт ва иқлим ўзгариши вазири сифатида тоза энергия инқилобига масъул бўлган Хабекнинг таъкидлашича, яшил энергияга ўтиш барқарор ўсишда марказий аҳамият касб этади.

«Германия жуда муаммоли технология остида чизиқ тортмоқда. Атом энергетикасидан воз кечиш мамлакатимизни хавфсизроқ қилади ва радиоактив чиқиндиларнинг олдини олишга ёрдам беради», — деди атроф-муҳит вазири Штеффи Лемке атом станцияларининг шу ҳафтада ёпилиши ҳақида гапирар экан.

Танқидчиларнинг фикрича, ядро энергетикасидан воз кечиш Германияни энг зарарли қазилма ёқилғиси ҳисобланган ва учинчи чоракда Германия электр энергиясининг қарийб учдан бир қисмини таъминлаган кўмирга қарамлигини оширади. Бу Германияни Шарқий Европанинг Польша ва Чехия каби саноати ривожланган мамлакатлари қаторида минтақадаги энг йирик кўмир истеъмолчиларидан бирига айлантиради.

Қайта тикланадиган энергия ислоҳотини амалга оширувчи Хабек режасига мувофиқ ҳолда Берлин ҳукумати кўмирда ишлайдиган электр станцияларининг ёпилишини 2030 йилга қолдиришга умид қилмоқда. Режада янги биноларнинг томига қуёш панелларини ўрнатиш ва Германия ер майдонининг 2 фоизидан шамол станциялари учун фойдаланиш назарда тутилган.

Қайд этилишича, Германияда қолган учта атом реактори 2022 йилда ёпилади.

Бутун дунё мамлакатлари қазиб олинадиган ёқилғидан тоза энергия манбаларига ўтаётган бир пайтда, ядровий муаммолар Европани ажратиб қўйишда давом этмоқда. Январь ойида Европа Комиссияси яшил энергия таснифи рўйхатини тақдим этади, унда углерод нейтраллиги мажбуриятлари бўйича қайси манбалар сармояга муносиб экани кўрсатилган бўлади.

Аввалроқ Бельгия ҳукумати 2025 йилга қадар мамлакатдаги барча атом электростанциялари ёпилишини маълум қилганди.