«Хоразм ҳудудий электр тармоқлари корхонаси» собиқ бош директори Муродбой Базаримбетов пора олишда гумон қилиниб, ҳибсга олингани ҳақида 2021 йил 8 январь куни маълум қилинганди.
Қайд этилишича, Базаримбетов ўртага ишончли одамини қўйиб, ёнилғи қуйиш шохобчасини электр тармоғига улаб бериш учун тадбиркордан 20 минг АҚШ доллари сўраганликда гумонланган. Кейинчалик бу қиймат 15 мингга туширилган.
Шундан сўнг тадбиркор депутатга шикоят қилган. У эса ўз навбатида ҳуқуқ-тартибот идораларини хабардор қилган.
Улар махсус тадбирда ўртадаги шахсни ҳамкорлик қилишга кўндирган. 24 декабрь куни ўртадаги ишончли шахс пулни Базаримбетовнинг кабинетига киритиб берганидан сўнг, ҳуқуқ-тартибот идоралари ходимлари раҳбарни қўлга олган.
Тезкор тадбирда ўртадаги шахс ва раҳбарнинг мулоқоти ёзиб олинган. Аудиоёзувларда раҳбарнинг ўртадаги шахсга қарата айтган «Пулнинг ҳаммасини бердими? Ҳаммасини олдингми? Мана бу тумбочкага қўй», деган сўзлари бор.
Декабрь охирида Хоразм вилоят судининг ЖИБ судлов ҳайъатида «Хоразм ҳудудий электр тармоқлари» АЖ собиқ бош директори Муродбой Базаримбетов ва жамият бўлимининг собиқ бошлиғи К.Б.га нисбатан Хива шаҳар судининг 9 июлдаги ҳукми юзасидан берилган апелляция шикояти кўриб чиқилди.
Хоразм вилоят судининг ЖИБ судлов ҳайъати биринчи инстанция суди ҳукмини ўзгаришсиз қолдириш, апелляция шикоятларини қаноатлантирмаслик тўғрисида ажрим чиқарди.
Ҳукмга кўра, Муродбой Базаримбетовга Жиноят кодексининг 210-моддаси 3-қисми «а» банди (жуда кўп миқдорда пора олиш) билан 45-модда (муайян ҳуқуқдан маҳрум қилиш) қўлланиб, 3 йил давлат иштирокидаги корхона ва ташкилотларда моддий жавобгар шахс ҳамда мансабдорлик лавозимларида ишлаш ҳуқуқидан маҳрум қилиш, 57-модда (енгилроқ жазо тайинлаш) қўлланиб, 8 йил озодликдан маҳрум қилиш жазоси тайинланган. Унга жазони умумий тартибли колонияларда ўташ белгиланган.
Унинг шериги К.Б.га эса Жиноят кодексининг 28 ва 210-моддаси 3-қисми «а» банди билан 45-модда қўлланиб, 2 йил давлат иштирокидаги корхона ва ташкилотларда моддий жавобгар шахс ҳамда мансабдорлик лавозимларида ишлаш ҳуқуқидан маҳрум қилиш, 57-модда қўлланиб, 6 йил озодликдан маҳрум қилиш жазоси тайинланган. Унга ҳам жазони умумий тартибли колонияларда ўташ белгиланган.
Суд ҳужжатларига кўра, судланувчилар олдиндан жиноий тил бириктириб, гуруҳ бўлиб, Тупроққалъа тумани, «Соримой» посёлкасида янгидан ташкил қилинаётган «Б.А.М.» МЧЖга қарашли автомобилларга сиқилган газ қуйиш шохобчаси учун ўрнатиладиган трансформатор пунктини 6-10 киловаттлик электр линиясига яқин таянчдан улаб бериш бўйича мурожаат қилганидан фойдаланган.
К.Б. тадбиркорнинг ушбу мурожаати натижаси тўғрисида сўраган З.А.га ишини ижобий ҳал қилиб беришини айтиб, бунинг эвазига тадбиркордан 15 минг АҚШ доллари олиб беришини айтган.
К.Б. Хонқа тумани ҳудудида З.А.дан Nexia-3 русумли автомашинаси салонида 15 минг долларни Муродбой Базаримбетовга пора тариқасида олиб бориб бериш учун олганида ушланган ва пора олиш жиноятини содир қилишда иштирокчилик қилган.
Давом эттирилган тадбир натижасида Муродбой Базаримбетов ўз хизмат мавқейидан фойдаланган ҳолда К.Б.дан 15 минг долларни олганида қўлга тушган.
Тарафлар апелляция инстанцияси судининг ажрими устидан Олий суд ЖИБ судлов ҳайъатига кассация тартибида шикоят, протест билдириши мумкин.
Аввалроқ Жиззах вилояти ҳокимининг собиқ ўринбосари Акром Раҳмонқулов 7 йил 6 ой муддатга озодликдан маҳрум қилингани ҳақида хабар берилганди.
Изоҳ (0)