30-dekabrga o‘tar kechasi Gruziya sobiq prezidenti Mixail Saakashvili jismoniy qarshilik ko‘rsatganiga qaramay, mamlakat Mudofaa vazirligi gospitalidan alohida mahbuslar uchun mo‘ljallangan Rustavi shahridagi maxsus hibsxonaga ko‘chirildi. Bu haqda Saakashvilining advokatlari guruhiga tayanib, “Kommersant” xabar berdi.
“Saakashvilini Goridan o‘g‘irlab ketishdi”, — deb yozadi sobiq president davrida adliya vaziri bo‘lgan Gvaramiya o‘zining ijtimoiy tarmoqlardagi sahifasiga.
Mixail Saakashvili a’zo hisoblanuvchi “Yagona milliy harakat” partiyasi deputati Eka Xerxeulidze jurnalistlar bilan suhbatda sobiq prezidentni “kuch bilan” qamoqqa ko‘chirishganini ma’lum qilgan. Shu bilan birga, uning aytishicha, gospital va Rustavi tomonga eltuvchi butun yo‘l “maxsus kuchlar bilan to‘la bo‘lgan”.
“Glavniy kanal” muxolifat telekompaniyasi to‘g‘ridan to‘g‘ri efirda avtomobillar kolonnasi katta tezlikda Rustavi tomon harakatlanayotgani tasvirlangan kadrlarni ko‘rsatgan. Aftidan ularning birida Mixail Saakashvili Jazoni ijro etish departamenti xodimlari bilan birga bo‘lgan.
Ta’kidlanishicha, 28-dekabrga o‘tar kechasi sobiq prezidenti Rustavidagi qamoqxonaga ko‘chirishmoqchi bo‘lgan. Harbiy gospital rahbariyati davolash kurslari muvaffaqiyatli yakunlanganini bildirgan. Ammo o‘shanda Saakashvilining ahvoli palatadan chiqishda yomonlashgan, u hushini yo‘qotgani sabab yana bir sutkaga gospitalda qoldirilgan.
Eslatib o‘tamiz, 19-noyabr kuni 49 kundan beri ochlik saqlab kelayotgan Saakashvili advokati bilan uchrashuv vaqtida yiqilib tushib, hushidan ketgani haqida xabar berilgandi. Yiqilgach, u ko‘zini ochmagan va hech narsani sezmagan. Saakashvilini “nosilka”da olib ketishgan. U qamoqxona shifoxonasining jonlantirish bo‘limiga yotqizilgan. Keyinroq Saakashvili Gori shahridagi harbiy gospitalga ko‘chirilgan.
Saakashvilining shaxsiy shifokori Nikoloz Kipshidze Gruziya sobiq prezidentining ahvoli keskin yomonlashganini ma’lum qilgan. Shifokorning so‘zlariga ko‘ra, organizmdagi endokrinologik va metabolik o‘zgarishlar natijasida yuzaga kelgan teri sarg‘ayishi avvalgi kunlarga nisbatan kuchaygan. Doktor Kipshidze yaqin kunlarda bu o‘zgarishlar tuzatib bo‘lmas holga kelishidan xavotirda edi.
Izoh (0)