Iroq bosh vaziri Mustafo al-Kozimiy AQSh boshchiligidagi koalitsiya Iroqda jangovar missiyasini yakunlab, qo‘shinlarni mamlakatda olib chiqib ketayotganini tasdiqladi. Bu haqda Sinhua agentligi xabar berdi.
Siyosatchi, shuningdek, koalitsiyaga minnatdorlik bildirgan va Iroq Qurolli kuchlari aholini IShID jangarilari xavfidan himoya qilishga tayyorligiga ishontirgan.
“Xalqaro koalitsiyaning jangovar missiyasi yakunlandi va butun jangovar texnikalar Iroqdan olib chiqib ketildi. Koalitsiyaning roli strategik dialogga ko‘ra, konsultatsiya va qo‘llab-quvvatlov bilan cheklandi”, — deb yozadi Kozimiy o‘zining Twitter’dagi sahifasiga.
Eslatib o‘tamiz, 2020-yilning 5-yanvarida Iroq parlamenti hukumatdan mamlakatda xorij kuchlarining bo‘lishini to‘xtatishni talab qiluvchi rezolyutsiyani qabul qilgandi. 2021-yilning iyulida AQSh va Iroq strategik dialog o‘tkazib, uning doirasida Amerika qo‘shinlarini mamlakatda 31-dekabrgacha olib chiqib ketishga kelishib olgan edi.
Ma’lumot uchun, AQSh Iroqqa 2003-yilda bostirib kirgan, mamlakatda hukmronlik qilgan diktator Saddam Husaynning terrorchilar bilan ehtimoliy aloqasi buning uchun rasmiy sabab bo‘lib xizmat qilgan. Husayn rejimi ag‘darilganidan keyin Amerika qo‘shinlari “Al-Qoida” va IShIDga qarshi mahalliy operatsiyalar o‘tkazish bilan shug‘ullangan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)