Польша пойтахти Варшавада шахматнинг рапид ва блиц йўналиши бўйича Жаҳон чемпионатида ўзбекистонлик Нодирбек Абдусатторов шахмат бўйича жаҳон чемпионига айлангани тўғрисида хабар берилганди. Ўзбекистон президенти Шавкат Мирзиёев Санкт-Петербургдан Тошкентга қайтаётган самолётда Абдусатторовнинг иштирокини катта қизиқиш билан онлайн кузатиб борган. Бу ҳақда давлат раҳбарининг матбуот котиби Шерзод Асадов маълум қилди.
«МДҲнинг норасмий саммити бўлиб ўтган Санкт-Петербургдан Тошкентга қайтаётган самолётда президентимиз ва бутун делегация тезкор шахмат бўйича Жаҳон чемпионатида ҳамюртимиз Нодирбек Абдусатторовнинг иштирокини катта қизиқиш билан онлайн кузатиб борди. Давлатимиз раҳбари шахматнинг рапид йўналиши бўйича янги ва энг ёш жаҳон чемпионига ўзининг энг самимий табрикларини йўлламоқда ҳамда унинг ота-онаси ва мураббийларига миннатдорлик билдирмоқда. Баракалла!», — дейилади хабарда.
Нодирбек 10-турда 5 карра жаҳон чемпиони Магнус Карлсенни мағлубиятга учратганди. Шундан кейин кетма-кет 3 турда дуранг натижа қайд этди: 13-турда мезбон Ян Кшиштоф билан кучлар тенг келган бўлса, 11-турда россиялик Владимир Федосейев, 12-турда эса ҳиндистонлик Гукеш Доммаражуга қарши қийин ўйинлар ўтказиб, сўнгги дақиқаларда вазиятни ўнглади ва дурангга эришди.
Маълумот учун, очиқ Жаҳон чемпионатининг умумий соврин жамғармаси 1 миллион долларни ташкил қилади. Блиц йўналишидаги баҳслар 29—30 декабрь кунлари бўлиб ўтиши режалаштирилган.
Нодирбек Абдусатторов 2017 йилда, 13 ёшида гроссмейстерлик унвонини олган. 2021 йил январь ҳолатига кўра, Абдусатторов шахмат тарихидаги энг ёш бешинчи гроссмейстер бўлиб турибди. У 2018 йилда Ўзбекистон терма жамоаси сафида Бутунжаҳон шахмат Олимпиадасида биринчи ўринни қўлга киритганди ва Президент совғаси — Spark автомобилини қабул қилиб олганди.
Қайд этиш керак, Абдусатторов Магнус Карлсенни мағлуб этган иккинчи ўзбекистонлик шахматчига айланди. 2018 йилда 16 ёшли Шамсиддин Воҳидов Санкт-Петербургда норвегиялик шахматчидан устун келганди.
Изоҳ (0)