Қашқадарё вилояти Шаҳрисабз туманида Янги йил байрами арафасида 180 та оилага янги хонадон калитлари топширилди, дея хабар берди «Дарё» мухбири.
Қайд этилишича, 28 декабрь куни туманда «Қишлоққурилишинвест» инжиниринг компанияси вилоят филиали буюртмаси асосида қуриб битказилган 6 та 30 хонадонли кўп қаватли уйлар калити ўз эгаларига топширилган.
«Президентимизнинг 2021 йил 11 мартдаги фармонига асосан Қашқадарёда ‘Қишлоққурилишинвест’ инжиниринг компанияси вилоят филиали буюртмасига кўра вилоятнинг қишлоқ жойларида қиймати 132,2 миллиард сўмлик 900 хонадондан иборат 35 та кўп қаватли арзон уй-жой қурилди. Шундан олтитаси бугун фойдаланишга топширилди», — дейди инжиниринг компанияси вилоят филиали директори Қўйли Нарзуллаев.
Вилоятда аҳоли эҳтиёжи учун қуриб битказилаётган 35 та кўп қаватли уй учун сарфланаётган 132,2 миллиард сўм маблағ «Осиё тараққиёти банки» маблағлари ҳисобидан молиялаштирилган.
«Саккиз йилдан бери ижарама-ижара яшаб келдик. Ҳар сафар телевизордан ногиронлиги бор фуқароларга янги хонадон калитлари топширилганини кўрсам, йиғлардим. Қачон менга ҳам шундай уй беришаркан, қачон мен ҳам ижарама-ижара юриш машаққатларидан қутиларканман, дердим. Нолам Яратганга етган экан, Янги йил байрами арафасида уйли бўлдим. Президентимизга раҳмат», — дейди биринчи гуруҳ ногирони Интизор Турдиева.
Изоҳ (0)