Самарқандда фуқароларни 30 минг доллар эвазига Мексика орқали АҚШга юбормоқчи бўлган шахслар ушланди

Самарқанд вилоятида фуқароларни ноқонуний равишда АҚШга юбормоқчи бўлган шахслар қўлга олинди.

Давлат хавфсизлик хизматининг Самарқанд вилояти бўйича бошқармаси ҳамда вилоят ички ишлар бошқармаси ходимлари томонидан ўтказилган тезкор тадбирда Самарқанд туманида яшовчи 2 нафар шахс (1985 ва 1991 йилларда туғилган) Самарқанд шаҳрида истиқомат қилувчи 2 фуқарони АҚШга юбориш учун уларнинг ҳар биридан 30 мингдан, жами 60 минг АҚШ доллари талаб қилиб, олдиндан 20 минг доллар олган вақтида ушланди.

Аниқланишича, уларни Ўзбекистон—Туркия—Боливия—Колумбия—Мексика—АҚШ йўналиши орқали АҚШга юбориш режалаштирилган.

Шунингдек, уларга йўлга чиқишдан аввал ПЗР-тест маълумотномасига ва ҳисобида 4 минг АҚШ доллари бўлган Visa-картага эга бўлишлари кераклиги ҳамда ҳар бир давлат ҳудудида уларни кузатиб қўювчи шахсларнинг талабларини, жумладан, Амазонка дарёсининг Колумбиядан оқиб ўтувчи қисмидан ва Мексиканинг ўрмонларидан ўтиб олиш бўйича талабларини бажаришлари зарурлиги тушунтирилган.

Бундан ташқари, тадбир давомида ҳибсга олинган шахсларда 60 нафардан ортиқ фуқароларнинг паспорт нусхалари борлиги ҳам аниқланди.

Ҳозирда мазкур ҳолат юзасидан Жиноят кодексининг тегишли моддасига асосан жиноят иши қўзғатилиб, тергов ҳаракатлари олиб борилмоқда.