Тошкент шаҳрининг Яшнобод тумани, «Мумтоз» маҳалласида истиқомат қилувчи фуқаро ўз уйига шу кунга қадар 522 марта тез ёрдам чақиргани маълум қилинди. Бу ҳақда 28 декабрь куни ОАВ ходимлари учун пойтахтдаги тиббиёт муассасаларига уюштирилган пресс-тур давомида айтилди, дея хабар берди «Дарё» мухбири.
Тез тиббий ёрдам Call-марказ бўлими мудири Насиба Маҳмудованинг сўзларига кўра, аёл кунига 2-3 марта тез тиббий ёрдам чақиради.
«Яшнобод туманидига «Мумтоз» маҳалласида яшовчи аёл шу кунгача 522 маротаба тез тиббий ёрдамга мурожаат қилган. У ҳар куни 2-3 бор чақириқни амалга оширади. Баъзи беморларга тез тиббий ёрдам муҳим ҳолатлардагина чақирилиши кераклигини тушунтирсангиз, улар бизнинг фаолиятимиздан норози бўлади», — дейди Насиба Маҳмудова.
2020 йилнинг ноябрь ойида Соғлиқни сақлаш вазири ўринбосари Абдулла Азизов жорий йилда «103» тез тиббий ёрдам рақамига 10 миллиондан ошиқ мурожаатлар келиб тушганини маълум қилган эди.
Жорий йилнинг февраль ойида Абдулла Азизов Ўзбекистонда тез тиббий ёрдамнинг бир марталик ташрифи ўртача 150 минг сўмга тушиши ҳақида айтган эди.
Май ойида Республика шошилинч тез тиббий ёрдами илмий маркази бош директори Даврон Тўлаганов 2021 йилда битта тез тиббий ёрдам чақириғи учун 7700 сўмдан маблағ ажратилганини таъкидлаганди.
Декабрь ойида ССВ матбуот хизмати берган хабарга кўра, мамлакатда 2021 йилнинг 1 январидан 1 декабрига қадар тез ёрдам хизматига мамлакат бўйича жами 6301 та ёлғон чақириқ келиб тушган.
Изоҳ (0)