Ўзбекистонда 2022 йил охиригача давлат ОТМларида ўқув адабиётлари электронлаштирилади

«Давлат олий таълим муассасаларининг академик ва ташкилий-бошқарув мустақиллигини таъминлаш бўйича қўшимча чора-тадбирлар тўғрисида»ги президент қарори қабул қилинди. Ҳужжат билан Вазирлар Маҳкамаси, вазирлик (идора)ларнинг айрим ваколатлари таълим муассасаларига ўтказилмоқда.

Унга кўра, қуйидаги ваколатлар ОТМларга берилмоқда:

• чет эл фуқароларининг ўқишини хорижий олий таълим муассасаларидан республика давлат олий таълим муассасаларига кўчириш;
• олий таълим муассасаси қабул комиссияси раиси ва масъул котибини, шунингдек, олий таълим муассасаси томонидан ўтказиладиган имтиҳонлар бўйича қабул комиссияси раиси ва аъзолари, имтиҳонлар жадвали, имтиҳон олинадиган фанлар дастурлари ва баҳолаш мезонларини тасдиқлаш;
• олий, ўрта махсус ва профессионал таълим муассасаларида таълим олувчиларнинг амалиётни ўташ тартибини тасдиқлаш ва уни ташкил этиш;
• олий, ўрта махсус ва профессионал таълим муассасаларида ички тартиб қоидалари, жумладан таълим олувчиларнинг кийим-бошига доир талабларни белгилаш.

Шунингдек, қарорга мувофиқ 2022 йил якунига қадар барча давлат олий таълим муассасалари кутубхона фондидаги ўқув адабиётларининг тўлиқ электрон шаклга ўтказилишини таъминланади ҳамда Олий ва ўрта махсус таълим вазирлиги ҳузурида ягона «Электрон кутубхона» платформасини ишга туширилади. «Электрон кутубхона» платформасини ишлаб чиқиш ва юритиш Олий таълим муассасаларини ривожлантириш жамғармаси маблағлари ҳисобидан амалга оширилади.

Вазирлик Таълим сифатини назорат қилиш давлат инспекцияси ҳамда тизимида олий таълим муассасалари мавжуд вазирлик (идора)лар билан биргаликда:

биринчи босқичда — 2022 йил 1 мартга қадар:

• Ахборот тизимининг «Ўқув жараёнини бошқариш» қисмини жорий қилинади. Бунда олий таълим муассасасининг академик фаолияти, хусусан, талабанинг давомат ҳисоботи, ўзлаштириш қайдномаси ва рейтинг дафтарчаси, шунингдек, гуруҳ журнали, дарс ва имтиҳон жадваллари рақамлаштирилади;
• Ахборот тизимининг «Илмий жараённи бошқариш» қисмини жорий қилинади. Бунда профессор-ўқитувчиларнинг илмий лойиҳалари, мақолалари, илмий-услубий нашрлари, илмий изланувчилар тўғрисидаги маълумотлар базаси шакллантирилади ҳамда профессор-ўқитувчилар ва кафедраларнинг илмий салоҳиятини баҳолаш масалалари автоматлаштирилади;
• Ахборот тизимининг «Маъмурий жараённи бошқариш» қисмини жорий қилинади. Бунда олий таълим муассасасининг тузилмаси, бошқарув кадрлари, профессор-ўқитувчилар таркиби ва талабалар тўғрисидаги маълумотларни юритиш ҳамда тегишли ҳисоботларни тайёрлаш рақамлаштирилади;
• Ахборот тизимининг «Молия-хўжалик фаолиятини бошқариш» қисмини жорий қилинади. Бунда тўлов-шартномалар электрон кўринишда тақдим этилади, стипендия тўловлари тўғрисидаги маълумотлар тизим орқали амалга оширилади.

иккинчи босқичда — 2022 йил 1 майга қадар:

• Ахборот тизимининг «Таълим сифатини назорат қилиш» қисмини жорий қилинади. Бунда таълим сифати бўйича олий таълим муассасалари кўрсаткичларининг маълумотлар базаси шакллантирилади ва олий таълим муассасалари миллий рейтингини юритиш автоматлаштирилади ҳамда таълим сифати мониторингини масофавий шаклда олиб бориш имконияти яратилади.

Аввалроқ Ўзбекистон ОТМларининг умумий рейтинги тузилгани, Ўзбекистонда хорижий олий таълим ташкилотлари сони сўнгги 3 йилда икки баробар ошгани, мамлакатда молиявий мустақил ОТМларга қўшимча ваколатлар берилиши тўғрисида хабар берилганди.