Polsha poytaxti Varshavada shaxmatning rapid va blits yo‘nalishi bo‘yicha Jahon chempionatida o‘zbekistonlik Nodirbek Abdusattorov shaxmat bo‘yicha jahon chempioniga aylangani to‘g‘risida xabar berilgandi. O‘zbekiston prezidenti Shavkat Mirziyoyev Sankt-Peterburgdan Toshkentga qaytayotgan samolyotda Abdusattorovning ishtirokini katta qiziqish bilan onlayn kuzatib borgan. Bu haqda davlat rahbarining matbuot kotibi Sherzod Asadov ma’lum qildi.
“MDHning norasmiy sammiti bo‘lib o‘tgan Sankt-Peterburgdan Toshkentga qaytayotgan samolyotda prezidentimiz va butun delegatsiya tezkor shaxmat bo‘yicha Jahon chempionatida hamyurtimiz Nodirbek Abdusattorovning ishtirokini katta qiziqish bilan onlayn kuzatib bordi. Davlatimiz rahbari shaxmatning rapid yo‘nalishi bo‘yicha yangi va eng yosh jahon chempioniga o‘zining eng samimiy tabriklarini yo‘llamoqda hamda uning ota-onasi va murabbiylariga minnatdorlik bildirmoqda. Barakalla!”, — deyiladi xabarda.
Nodirbek 10-turda 5 karra jahon chempioni Magnus Karlsenni mag‘lubiyatga uchratgandi. Shundan keyin ketma-ket 3 turda durang natija qayd etdi: 13-turda mezbon Yan Kshishtof bilan kuchlar teng kelgan bo‘lsa, 11-turda rossiyalik Vladimir Fedoseyev, 12-turda esa hindistonlik Gukesh Dommarajuga qarshi qiyin o‘yinlar o‘tkazib, so‘nggi daqiqalarda vaziyatni o‘ngladi va durangga erishdi.
Ma’lumot uchun, ochiq Jahon chempionatining umumiy sovrin jamg‘armasi 1 million dollarni tashkil qiladi. Blits yo‘nalishidagi bahslar 29—30-dekabr kunlari bo‘lib o‘tishi rejalashtirilgan.
Nodirbek Abdusattorov 2017-yilda, 13 yoshida grossmeysterlik unvonini olgan. 2021-yil yanvar holatiga ko‘ra, Abdusattorov shaxmat tarixidagi eng yosh beshinchi grossmeyster bo‘lib turibdi. U 2018-yilda O‘zbekiston terma jamoasi safida Butunjahon shaxmat Olimpiadasida birinchi o‘rinni qo‘lga kiritgandi va Prezident sovg‘asi — Spark avtomobilini qabul qilib olgandi.
Qayd etish kerak, Abdusattorov Magnus Karlsenni mag‘lub etgan ikkinchi o‘zbekistonlik shaxmatchiga aylandi. 2018-yilda 16 yoshli Shamsiddin Vohidov Sankt-Peterburgda norvegiyalik shaxmatchidan ustun kelgandi.
Izoh (0)