Qashqadaryo viloyati Shahrisabz tumanida Yangi yil bayrami arafasida 180 ta oilaga yangi xonadon kalitlari topshirildi, deya xabar berdi “Daryo” muxbiri.
Qayd etilishicha, 28-dekabr kuni tumanda “Qishloqqurilishinvest” injiniring kompaniyasi viloyat filiali buyurtmasi asosida qurib bitkazilgan 6 ta 30 xonadonli ko‘p qavatli uylar kaliti o‘z egalariga topshirilgan.
“Prezidentimizning 2021-yil 11-martdagi farmoniga asosan Qashqadaryoda ‘Qishloqqurilishinvest’ injiniring kompaniyasi viloyat filiali buyurtmasiga ko‘ra viloyatning qishloq joylarida qiymati 132,2 milliard so‘mlik 900 xonadondan iborat 35 ta ko‘p qavatli arzon uy-joy qurildi. Shundan oltitasi bugun foydalanishga topshirildi”, — deydi injiniring kompaniyasi viloyat filiali direktori Qo‘yli Narzullayev.
Mavzuga doir: Qashqadaryoda 2021-yil yakuniga qadar 900 xonadonli 35 ta arzonlashtirilgan uy quriladi
Viloyatda aholi ehtiyoji uchun qurib bitkazilayotgan 35 ta ko‘p qavatli uy uchun sarflanayotgan 132,2 milliard so‘m mablag‘ “Osiyo taraqqiyoti banki” mablag‘lari hisobidan moliyalashtirilgan.
“Sakkiz yildan beri ijarama-ijara yashab keldik. Har safar televizordan nogironligi bor fuqarolarga yangi xonadon kalitlari topshirilganini ko‘rsam, yig‘lardim. Qachon menga ham shunday uy berisharkan, qachon men ham ijarama-ijara yurish mashaqqatlaridan qutilarkanman, derdim. Nolam Yaratganga yetgan ekan, Yangi yil bayrami arafasida uyli bo‘ldim. Prezidentimizga rahmat”, — deydi birinchi guruh nogironi Intizor Turdiyeva.
Izoh (0)