Давлат статистика қўмитаси компания ва товар белгилари бўйича очиқ маълумотларни жойлаштирган «Orginfo.uz» сайти асосчиси, дастурчи Бобурмирзо Ҳамроқулов устидан ҳуқуқни муҳофаза қилувчи органларга ариза бергани тўғрисида хабар берилганди. «Kun.uz» нашрининг ёзишича, Асака туман ИИБ томонидан олиб борилган терговга қадар текширув унинг ҳаракатларида ҳуқуқбузарлик аломатлари бўлмагани сабабли тугатилган.
«Ўзбекистон Давлат статистика қўмитасининг алоқа хатида сиз томонингиздан ‘Orginfo.uz’ номли сайт яратилиб, ‘Stat.uz’ сайти томонидан чиқарилган маълумотларни ўз сайтингизга жойлаб келганингиз маълум қилинган. Олиб борилган терговга қадар текширув ҳаракатлари натижасида сизнинг ҳаракатларингизда жиноят ва маъмурий ҳуқуқбузарлик аломати мавжуд бўлмаганлиги сабабли, жиноят ишини қўзғатишни рад этиш тўғрисида қарор қабул қилинганлигини маълум қиламиз», — Асака тумани ИИБ томонидан фуқарога йўлланган хатда.
Бобурмирзо Ҳамроқулов «Orginfo.uz» сайти ўз фаолиятини давом эттиришини айтиб, бундан ҳеч қандай моддий ёки бошқа турдаги манфаат кутмаслигини яна бир бор таъкидлаган. У қўллаб-қувватлагани учун ОАВ ва блогерларга, кенг жамоатчиликка ўз миннатдорчилигини билдирган.
Маълумот учун, «Orginfo.uz» — бу Статистика қўмитасининг очиқ маълумотлари асосида компаниялар ҳақидаги маълумотлар — СТИР, фаолият тури, рўйхатдан ўтган манзили ва санаси, таъсисчилар ва бошқарувчилар рўйхати ва бошқаларни тақдим этувчи хизмати. Сайтдаги маълумотлар Давлат статистика қўмитасининг Корхоналар ва ташкилотларнинг ягона давлат реестри маълумотларини такрорлайди, бироқ давлат органи ресурси билан солиштирганда, бир қатор қулайликларга эга.
Хусусан, «Orginfo.uz» сайтида компаниялар тўғрисидаги маълумотларни уларнинг номи, шунингдек, таъсисчилар ва менежерларнинг исм-шарифлари бўйича ҳам қидириш мумкин, КТЯДРда эса СТИРни билиш керак бўлади. Бундан ташқари, хизмат савдо белгилари, шунингдек, уларнинг эгалари ҳақидаги маълумотларни ҳам топиш имконини беради.
«Orginfo.uz» орқали компаниянинг аффилланган шахсларини, шунингдек, у ёки бу таъсисчиларга тегишли барча компаниялар рўйхатини тезкор аниқлаш мумкин. Ўзбекистондаги ахборот нашрлари ҳам ўз изланишларида Статистика қўмитаси сервиси имкониятлари чеклангани сабабли тез-тез «Orginfo.uz» хизматидан фойдаланиб туради.
18 декабрь куни Давлат статистика қўмитаси ушбу мавзу юзасидан Telegram-каналида расмий муносабат билдирганди. Ўшанда қўмита «Orginfo.uz» веб-сайти ва шу каби бошқа электрон платформаларнинг ёпилиши тарафдори эмаслигини маълум қилган.
Изоҳ (0)