Davlat statistika qo‘mitasi kompaniya va tovar belgilari bo‘yicha ochiq ma’lumotlarni joylashtirgan “Orginfo.uz” sayti asoschisi, dasturchi Boburmirzo Hamroqulov ustidan huquqni muhofaza qiluvchi organlarga ariza bergani to‘g‘risida xabar berilgandi. “Kun.uz” nashrining yozishicha, Asaka tuman IIB tomonidan olib borilgan tergovga qadar tekshiruv uning harakatlarida huquqbuzarlik alomatlari bo‘lmagani sababli tugatilgan.
“O‘zbekiston Davlat statistika qo‘mitasining aloqa xatida siz tomoningizdan ‘Orginfo.uz’ nomli sayt yaratilib, ‘Stat.uz’ sayti tomonidan chiqarilgan ma’lumotlarni o‘z saytingizga joylab kelganingiz ma’lum qilingan. Olib borilgan tergovga qadar tekshiruv harakatlari natijasida sizning harakatlaringizda jinoyat va ma’muriy huquqbuzarlik alomati mavjud bo‘lmaganligi sababli, jinoyat ishini qo‘zg‘atishni rad etish to‘g‘risida qaror qabul qilinganligini ma’lum qilamiz”, — Asaka tumani IIB tomonidan fuqaroga yo‘llangan xatda.
Boburmirzo Hamroqulov “Orginfo.uz” sayti o‘z faoliyatini davom ettirishini aytib, bundan hech qanday moddiy yoki boshqa turdagi manfaat kutmasligini yana bir bor ta’kidlagan. U qo‘llab-quvvatlagani uchun OAV va blogerlarga, keng jamoatchilikka o‘z minnatdorchiligini bildirgan.
Ma’lumot uchun, “Orginfo.uz” — bu Statistika qo‘mitasining ochiq ma’lumotlari asosida kompaniyalar haqidagi ma’lumotlar — STIR, faoliyat turi, ro‘yxatdan o‘tgan manzili va sanasi, ta’sischilar va boshqaruvchilar ro‘yxati va boshqalarni taqdim etuvchi xizmati. Saytdagi ma’lumotlar Davlat statistika qo‘mitasining Korxonalar va tashkilotlarning yagona davlat reyestri ma’lumotlarini takrorlaydi, biroq davlat organi resursi bilan solishtirganda, bir qator qulayliklarga ega.
Xususan, “Orginfo.uz” saytida kompaniyalar to‘g‘risidagi ma’lumotlarni ularning nomi, shuningdek, ta’sischilar va menejerlarning ism-shariflari bo‘yicha ham qidirish mumkin, KTYADRda esa STIRni bilish kerak bo‘ladi. Bundan tashqari, xizmat savdo belgilari, shuningdek, ularning egalari haqidagi ma’lumotlarni ham topish imkonini beradi.
“Orginfo.uz” orqali kompaniyaning affillangan shaxslarini, shuningdek, u yoki bu ta’sischilarga tegishli barcha kompaniyalar ro‘yxatini tezkor aniqlash mumkin. O‘zbekistondagi axborot nashrlari ham o‘z izlanishlarida Statistika qo‘mitasi servisi imkoniyatlari cheklangani sababli tez-tez “Orginfo.uz” xizmatidan foydalanib turadi.
18-dekabr kuni Davlat statistika qo‘mitasi ushbu mavzu yuzasidan Telegram-kanalida rasmiy munosabat bildirgandi. O‘shanda qo‘mita “Orginfo.uz” veb-sayti va shu kabi boshqa elektron platformalarning yopilishi tarafdori emasligini ma’lum qilgan.
Izoh (0)