Ягона республика процессинг маркази (Uzcard) 2022 йил январь ойи охиригача банкоматларида 50 ва 100 долларлик банкнотларни қабул қилиш функциясини тиклашни режалаштирмоқда. Бу ҳақда компания ва Марказий банк матбуот хизматига таяниб, «Gazeta.uz» хабар берди.
Эслатиб ўтамиз, сентябрь охирида баъзи банклар компанияга банкоматлар тармоғида 100 ва 50 долларлик сохта пулларни қайта ишлашнинг алоҳида ҳолатлари ҳақида хабар бергани сабабли валюта банкоматларида айирбошлаш функциясини тўхтатган эди.
Ягона республика процессинг маркази аниқланган муаммолардан сўнг «тегишли банкомат дастурий таъминотини янгилаш учун сотувчилар билан ўзаро ҳамкорлик жараёнини ва тақдим этилган намуналарни синовдан ўтказишни бошлаган».
«Компания 2022 йил январь ойи охирига қадар ишларни тўлиқ якунлаш ва банкнотларни қабул қилиш функциясини қайта тиклашни режалаштирмоқда», — дейилади компания хабарида.
«Банкоматларда қабул қилинган ва чиқарилган пул учун бўлимлар бир-биридан мустақил бўлиб, мижозлар томонидан қўйилган банкнотлар инкассацияга қадар банкоматда қолади. Кейин улар банкка боради, у ерда қалбаки банкнотлар аниқланади. Шунинг учун бу масала бутунлай банкларнинг ваколатига киради. Биз фақат алоҳида ҳолатлар бўйича сўровлар олдик, аммо бу хизматни тўхтатиб туриш ва муаммони ҳал қилишни бошлаш учун етарли эди», — дея қайд этди Ягона республика процессинг маркази.
Uzcard банкоматлар учун дастурий таъминот сотувчилари «Ускунанинг қўшимча хавфсизлигини таъминлаш учун барча керакли ўзгартиришлар киритилди», — дея таъкидлаган.
1 сентябрь ҳолатига кўра, Ўзбекистонда 12 814 та банкомат ва ўз-ўзига хизмат кўрсатиш инфокиосклари ўрнатилган.
Маълумот учун, Ўзбекистонда 2019 йил август ойида кўп йиллардан бери биринчи марта чет эл валютасини нақд кўринишда сотиб олишга рухсат берилди. Бунга қадар одамлар долларни фақат халқаро банк пластик карталари орқали (Visa, MasterCard ва бошқалар) сотиб олишлари мумкин эди.
Изоҳ (0)