Тошкентнинг Юнусобод тумани ҳудудидан ўтган Аҳмад Дониш кўчасидаги йўлнинг чўкиш ҳолати юзасидан жиноят иши қўзғатилди. Бу ҳақда ДХХ матбуот хизмати хабар берди.
2021 йилнинг март ойида Тошкент шаҳрининг Юнусобод туманида ҳудудидан ўтган Аҳмад Дониш кўчасидаги автомобиль йўлининг 500 метр қисмида 40-50 сантиметргача чўкиш ҳолати юзага келгани туфайли, ушбу ҳудудда транспорт воситаларининг ҳаракати вақтинча чекланган эди. Ҳолат юзасидан Давлат хавфсизлик хизмати ҳамда прокуратура органлари томонидан ўрганиш ишлари олиб борилган.
Ўрганишлар давомида мутасадди ташкилотлар томонидан Юнусобод—Туркистон ерости метро конструкциясининг атрофини ва ён қисмларини тупроқ билан қайта тўлдириш ва зичлаш ишлари сифатли бажарилмагани, техник назорат талаб даражасида олиб борилмагани ҳамда автомобиль йўлини реконструкция қилишда лойиҳалаштириш ишлари нотўғри олиб борилгани сабабли юқоридаги чўкиш ҳолати юзага келиб, натижада давлатга 4,5 миллиард сўм миқдорида зарар етказилган.
Ҳозирда ҳолат бўйича республика Транспорт прокуратураси томонидан Тошкент метрополитени линияларини қуриш дирекцияси ва Тошкент шаҳар ҳокимлиги Ягона буюртмачи хизмати инжиниринг компанияси мансабдор шахсларига нисбатан Жиноят кодексининг 207-моддаси (мансабга совуққонлик билан қараш) 1-қисми билан жиноят иши қўзғатилиб, тергов ҳаракатлари олиб борилмоқда.
Шунингдек, Аҳмад Дониш кўчасида юзага келган ҳолатни бартараф этиш бўйича мутасадди идоралар томонидан тегишли чора-тадбирлар ташкил этилмоқда.
Маълумот учун, 2020 йилнинг августида пойтахтдаги Аҳмад Дониш кўчасининг Амир Темур кўчасидан Тошкент халқа автомобиль йўлигача бўлган 2,2 километр қисми 6 қаторли қилиб қайта қурилганди. Август охирида президент Шавкат Мирзиёев ушбу кўчада амалга оширилган қурилиш ва ободонлаштириш ишларини бориб кўрган эди.
Эслатиб ўтамиз, Тошкент шаҳар бош имом-хатиби, ўша пайтда Юнусобод туманидаги «Мирза Юсуф» («Бодомзор») жоме масжиди имом-хатиби бўлган Саййид Раҳматуллоҳ Термизий ўз маърузасида йўл қурилиши соҳасидаги коррупция сабабли янги қурилган йўллар ҳам узоқ турмаслиги, кўп вақт ўтмай ёмон аҳволга келиб қолиши ҳақида гапирганди.
«Каттасидан тортиб оддий ишчисигача ‘Аллоҳ мени кўриб турибди’, деб йўл қурса нима бўлади, биродарлар? Йўллар ёмғир ёғгач чўкиб кетмайди, янги йўл қурилгач йил бўйи ремонт бўлиб ётмайди» — деган эди у.
Транспорт вазирлиги ҳузуридаги Автомобиль йўллари қўмитаси имомнинг маърузасидан норози бўлиб Мусулмонлар идорасига шикоят йўллаганди. Қўмита йўл қурилишига ажратиладиган маблағлар талон-торож қилиниши ҳақида гапирган имом-хатибнинг ижтимоий тармоқларда тарқалган маърузасига раддия берилишини сўраган. Бироқ имом сўзларида бирор бир ташкилот ва мансабдорни тилга олмаганини айтиб, раддия беришга мажбур эмаслигини таъкидлаганди.
Изоҳ (0)