Бухоро вилоятида жойлашган тунги кўнгилочар бар, кафе, ресторан, спа-салон, сауна ва массажхоналарда ўтказилган рейдлар давомида ОИВ инфекциясини юқтириб олган аёл фоҳишалик билан шуғулланиб келаётган аниқланди. Бу ҳақда «Дарё» мухбири хабар берди.
У 2017 йилда Бухоро вилояти ОИТСга қарши кураш марказида сифатида рўйхатга олиниб, бошқа шахсга касаллик юқтирган тақдирда Жиноят кодексининг 113-моддаси билан жазога тортилиши бўйича огоҳлантирилиб, тилхат олинган бўлса-да, бетартиб ҳаёт кечириб келган.
Моддий манфаат эвазига мижозларга интим хизмат кўрсатиб келиб, ўзидаги ОИВ инфекциясини юқтирганликда гумонланиб, мазкур ҳолат юзасидан тегишли ҳужжатлар расмийлаштирилиб, тергов органларига юборилган.
Маълум бўлишича, аёл қарийб 4 йил давомида касалликни қасддан бошқаларга юқтириб келган. Олиб борилган ўрганишлар натижасида у 40 га яқин эркакларга ОИВ инфекциясини юқтиргани аниқланган. Эркакларнинг аксарияти оилали. Натижада касаллик уларнинг турмуш ўртоқларига ҳам юққан.
«Март—апрель ойларида дўстларим билан кафеда овқатланиб ўтирганимизда, ёнимиздаги столда овқатланиб ўтирган икки нафар қиз билан танишиб қолдик. Улар билан бориб, яқин алоқада бўлдик. Шундан сўнг, улар билан бир неча маротаба телефонлашиб, дўстларим билан бориб, яқин алоқада бўлганимиздан кейин мен у қизларнинг касалликка чалинганини эшитиб қолиб, тиббий кўрикдан ўтганимда ўзимга ушбу касалликни юқтириб олганимни билиб қолдим. Турмуш ўртоғим ҳомиладор, ҳомила 6 ойлик», — дейди фоҳиша аёл билан алоқада бўлган эркаклардан бири.
Бухоро вилояти ИИБ ҳузуридаги тергов бўлими терговчиси Темур Нодировнинг маълум қилишича, ҳолат юзасидан Жиноят кодекси 113-моддасининг (таносил ёки ОИВ касаллиги/ОИТСни тарқатиш) 4-қисми билан жиноят иши қўзғатилиб, дастлабки тергов ҳаракатлари олиб борилган. Тергов якунида жиноят иши айблов хулосаси билан судга оширилган. Суд ҳукмига кўра, судланувчига нисбатан 6 йил 6 ой муддатга озодликдан маҳрум қилиш жазоси тайинланган.
Аввалроқ Бухорода ўндан ортиқ фуқарога таносил касаллигини юқтирган аёлга жиноят иши қўзғатилгани, Сирдарёда била туриб эрига ОИТС юқтирган аёл эрининг даъвоси йўқлиги боис қамалмагани тўғрисида хабар берилганди.
Изоҳ (0)