Навоий вилояти Кармана тумани халқ таълими бўлими мудири вазифасини вақтинча бажарувчи Насиба Содиқова ўз фаолиятида йўл қўйган камчиликлари сабаб ишдан олинди. Бу ҳақда Халқ таълими вазирлиги ахборот хизмати хабар берди.
Маълум қилинишича, туман халқ таълими бўлими Халқ таълими вазирлигининг топшириғига зид равишда чет тили ўқитувчиларига тарқатилаётган 1 миллион сўм маблағни нақд кўринишида бериб, бозор нархи 60 минг сўм бўлган китобни 483 минг сўмдан пулламоқчи бўлган.
Шу боис вазирликнинг бир неча бор мазкур ҳолат юзасидан огоҳлантиришига қарамай, ушбу ҳолатга йўл қўйгани учун туман халқ таълими бўлими мудири вазифасини вақтинча бажарувчи Насиба Содиқова ўз вазифасидан озод этилган. Шунингдек, туман ХТБнинг бош ҳисобчиси ва хорижий тиллар методистини лавозимидан озод этиш юзасидан вазирлик раҳбарияти томонидан топшириқ берилган.
«Халқ таълими вазирлиги юқоридаги каби ҳолатлар қайтарилиб, ўз тасдиғини топган тақдирда кескин ва аёвсиз чора кўрилиши ҳақида яна бир бор огоҳлантиради», — дейилади хабарда.
Тавсия этиладиган дарслик ва ўқув қўлланмаларининг рўйхати ҳамда уларни сотиб олганлик тўғрисида ҳисобот шакли Халқ таълими вазирлиги ва Вазирлар Маҳкамаси ҳузуридаги Хорижий тилларни ўрганишни оммалаштириш агентлиги томонидан белгиланиши кўрсатилган.
Аввалроқ Самарқандда тадбиркордан 2000 доллар пора олган халқ таълим бўлими мутахассиси ушлангани, Самарқандда туман ХТБ мудири ўринбосари 300 доллар пора билан қўлга тушгани тўғрисида хабар берилганди.
Мавзуга доир: Қарши шаҳар ХТБнинг 33 ёшли масъули ўз жонига қасд қилди
Изоҳ (0)