Buxoro viloyatida joylashgan tungi ko‘ngilochar bar, kafe, restoran, spa-salon, sauna va massajxonalarda o‘tkazilgan reydlar davomida OIV infeksiyasini yuqtirib olgan ayol fohishalik bilan shug‘ullanib kelayotgan aniqlandi. Bu haqda “Daryo” muxbiri xabar berdi.
U 2017-yilda Buxoro viloyati OITSga qarshi kurash markazida sifatida ro‘yxatga olinib, boshqa shaxsga kasallik yuqtirgan taqdirda Jinoyat kodeksining 113-moddasi bilan jazoga tortilishi bo‘yicha ogohlantirilib, tilxat olingan bo‘lsa-da, betartib hayot kechirib kelgan.
Moddiy manfaat evaziga mijozlarga intim xizmat ko‘rsatib kelib, o‘zidagi OIV infeksiyasini yuqtirganlikda gumonlanib, mazkur holat yuzasidan tegishli hujjatlar rasmiylashtirilib, tergov organlariga yuborilgan.
Ma’lum bo‘lishicha, ayol qariyb 4 yil davomida kasallikni qasddan boshqalarga yuqtirib kelgan. Olib borilgan o‘rganishlar natijasida u 40 ga yaqin erkaklarga OIV infeksiyasini yuqtirgani aniqlangan. Erkaklarning aksariyati oilali. Natijada kasallik ularning turmush o‘rtoqlariga ham yuqqan.
“Mart—aprel oylarida do‘stlarim bilan kafeda ovqatlanib o‘tirganimizda, yonimizdagi stolda ovqatlanib o‘tirgan ikki nafar qiz bilan tanishib qoldik. Ular bilan borib, yaqin aloqada bo‘ldik. Shundan so‘ng, ular bilan bir necha marotaba telefonlashib, do‘stlarim bilan borib, yaqin aloqada bo‘lganimizdan keyin men u qizlarning kasallikka chalinganini eshitib qolib, tibbiy ko‘rikdan o‘tganimda o‘zimga ushbu kasallikni yuqtirib olganimni bilib qoldim. Turmush o‘rtog‘im homilador, homila 6 oylik”, — deydi fohisha ayol bilan aloqada bo‘lgan erkaklardan biri.
Buxoro viloyati IIB huzuridagi tergov bo‘limi tergovchisi Temur Nodirovning ma’lum qilishicha, holat yuzasidan Jinoyat kodeksi 113-moddasining (tanosil yoki OIV kasalligi/OITSni tarqatish) 4-qismi bilan jinoyat ishi qo‘zg‘atilib, dastlabki tergov harakatlari olib borilgan. Tergov yakunida jinoyat ishi ayblov xulosasi bilan sudga oshirilgan. Sud hukmiga ko‘ra, sudlanuvchiga nisbatan 6 yil 6 oy muddatga ozodlikdan mahrum qilish jazosi tayinlangan.
Avvalroq Buxoroda o‘ndan ortiq fuqaroga tanosil kasalligini yuqtirgan ayolga jinoyat ishi qo‘zg‘atilgani, Sirdaryoda bila turib eriga OITS yuqtirgan ayol erining da’vosi yo‘qligi bois qamalmagani to‘g‘risida xabar berilgandi.
Izoh (0)