Буюк Британиянинг хавфсизлик масалалари бўйича вазири Демиан Хайндс Россия, Хитой ва Эрон ўзларининг разведка ва киберҳужум соҳасидаги имкониятлари сабаб Бирлашган Қиролликнинг асосий душманлари ҳисобланишини маълум қилди. Бу ҳақда The Telegraph нашрига таяниб, «Korrespondent.net» хабар берди.
«Мен тилга олган уч мамлакатнинг одам кучи ва техника жиҳатдан кибермакондаги иштироки катта, улар ҳар қандай масштабда кучларини жойлаштира олади», — дейди у. Хайндснинг таъкидлашича, ушбу мамлакатлар «кўплаб турли усуллар» ёрдамида ахборот операцияларини ўтказа олади.
Вазирнинг сўзларига кўра, Москва, Пекин ва Теҳроннинг душманлик ҳаракати ёлғон ахборот кампанияларидан ташқари, жосуслар ва аскарларининг «кутиш режими»да экани билан хавф туғдиради. Амалдор тўртинчи душман давлат дея КХДРни келтирган.
Шунингдек, Хайндс мазкур давлатлардан келаётган таҳдидларга қарши курашиш учун хорижлик жосусларга оид қонунчиликни янгилаш зарурлигини таъкидлаган.
Аввалроқ Эрон армияси беш кунлик ҳарбий машғулотлар якунида бир нечта баллистик ракеталарни учиргани тўғрисида хабар берилганди. Британия баллистик ракеталарнинг учирилишини кескин қоралаган.
Эслатиб ўтамиз, Ядро бўйича қўшма ҳаракатлар режаси деб номланадиган келишув 2015 йил ёзида Теҳрон ҳамда бешта воситачи мамлакат ўртасида имзоланган. Кейинчалик Эроннинг мазкур келишувни қўпол равишда бузганликда айблашган. 2018 йил май ойи бошида АҚШ келишувдан бир томонлама чиқишини эълон қилган ва Эронга қарши санкциялар қайта жорий қилинганини билдирди. Эрон эса келишув шартларига ортиқ риоя қилмаслиги ва 2020 йил январдан мазкур шартномадан тўлиқ чиққанини қайд этганди.
Изоҳ (0)